Astana tórinde Qadyr aqyndy eske alýǵa arnalǵan kesh ótedi

Bul shara Qazaqstan Respýblıkasy Mádenıet mınıstrligi men Astana qalasy ákimdiginiń qoldaýymen uıymdastyrylyp otyr. Halqymyzdyń ardaqty azamaty, qazaq poezııasynyń oıshyl aqyny Qadyr Myrza Áli shyǵarmalarynyń shoqtyǵy bıik. Ol ǵajap teńeýler keltirip, fılosofııalyq oılarmen túıin túıý arqyly qazaqtyń qara óleńin zańǵar shyńǵa shyǵardy.

Qadyr Myrza Áli  1935 jyly 5 qazanda Batys Qazaqstan oblysynyń (qazirgi Syrym aýdany) Jympıty kentinde týǵan. 1958 jyly Qazaq memlekettik ýnıversıtetiniń fılologııa fakýltetin támamdaǵan. Eńbek jolynda «Baldyrǵan», «Juldyz» jýrnaldarynda, Jazýshy baspasynda, Qazaqstan Jazýshylar odaǵynda qyzmet atqarǵan.

Tuńǵysh jınaǵy «Kóktem» 1959 jyly jaryq kórdi. 1966 jyly «Oı ormany» jınaǵy úshin Qazaqstan Lenın komsomolynyń syılyǵy berildi. 1980 jyly «Jeruıyq» jyr kitaby úshin Qazaq KSR Memlekettik syılyǵynyń laýreaty atandy. 2001 jyly Táýelsiz «Tarlan» syılyǵyn aldy.

Aqynnyń jetpisten astam poezııalyq, prozalyq, sondaı-aq ádebı-syn kitaptary jaryq kórgen, óleńderi mektep oqýlyqtaryna endi. Al ánge arnap jazylǵan óleńderiniń sany eki júzden asty. Olardyń kóbi halyqqa keń taraǵan. Talantty aqyn qalamynan halyq folklorynyń ataqty kúldirgi keıipkeri Aldar kóse jaıly «Saqal saýdasy», «Qasqyr qaqpan» atty ótkir satıraly komedııa men Mahambettiń eń sońǵy azapty kúnderine arnalǵan «Jaraly jolbarys» atty jáne «Ámir Temir» kesek dramalyq shyǵarmalary da jaryq kórgen.

2011 jyldyń 22 qańtarynda qazaq ádebıetiniń asa kórnekti ókili, QR Memlekettik syılyǵynyń ıegeri, Qazaqstannyń halyq jazýshysy, aqyn Qadyr Myrza Álı 77 jasqa qaraǵan shaǵynda ómirden ótti.

Uıymdastyrýshylar osy keshti «Joq! Ólmeımin! Pravom joq ólýge,

Sóz syılaıtyn halqym aman turǵanda!» degen ataýmen ótkizgeli tur. Bul aqynnyń sońǵy jazǵan óleńderiniń birinde aıtqan oı-túıini bolatyn.

Ádebı keshte aqyn týraly oılar ortaǵa salynyp, onyń óleńderine jazylǵan ánder shyrqalady.