Astana tórinde dástúrli ánniń mártebesi kóterildi
ASTANA. 18 qazan. QazAqparat - Qazaq ulttyq óner ýnıversıtetiniń kontsert zalynda «Qazaǵymnyń án-jyry, kóńilimniń jan nury» atty dástúrli án kontserti bolyp ótti.
Aıta ketý kerek, Qazaqstannyń eńbek sińirgen ártisi, belgili ánshi Qapash Qulysh Astana qalasyna qonys aýdaryp, eki jyldan beri Qazaq ulttyq óner ýnıversıtetinde shákirtter tárbıelep keledi. Óner keshin ashqan ol jınalǵan kórermenderge rızashylyǵyn bildirdi. «Elordaǵa kelgen soń, shirkin-aı, batys óńiriniń maıtalman ánshilerin jınap, sonyń ishinde Ǵarekeńnen (Ǵarıfolla Qurmanǵalıev) dáris alǵan óner juldyzdarynyń qatysýymen bir kontsert qoısam dep armandap edim. Búgin sonyń sáti tústi»,- dedi.
Osy óner keshine Túrkistannan Ǵarekeńniń alǵashqy shákirtteriniń biri QR Halyq ártisi Qajybek Bekbosynov kelip, birneshe án shyrqap, kórermenderdiń yqylasyna bólendi. Sondaı-aq Oral qalasynan elimizdiń eńbek sińirgen ártisi Sáýle Taýdaeva, Aqtóbeden elimizdiń eńbek sińirgen qaıratkeri Svetlana Myrzabaeva keldi. Osy tanymal ánshiler Muhıttyń ánderin shyrqady.
Kontsertke «Qońyr» toby qatysyp, Muhıt Meráliulynyń «Kók aıdaı» áninen bastap birneshe ánderdi shyrqap, kórermenderdiń qoshemetine bólendi.
Bul kontsertke Qapash Qulyshtan dáris alyp júrgen Qazaq ulttyq óner ýnıversıtetiniń án bóliminiń stýdentteri de qatysyp, án shyrqap, birneshe kúı tartty.
Kesh sońynda Qapash Qulysh: «Dástúrli ónerdi zańdastyrǵan eki óner ıesi bar. Onyń biri Ǵarıfolla Qurmanǵalıev bolsa, ekinshisi halqymyzdyń dástúrli án mektebiniń kórnekti ókili Júsipbek Elebekov. Solar salyp ketken dańǵyl joldy Qazaq ulttyq óner ýnıversıteti jalǵastyrady dep oılaımyn. Bizdiń dástúrli ónerimiz tek qana Qazaqstanda emes, halyqaralyq deńgeıge kóterilse eken. Oǵan ónerimiz laıyqty. Tárbıelep jatqan jastarymyz qazaqtyń atyn, úkilegen dombyrasyn, qobyzdyń keremet únin búkil dúnıe júzine tanytyp júr ǵoı. Áli de shyǵar bıigimiz alda»,- dep sózin qorytyndylady.
