Astana tóńiregindegi ormandy alqaptar elorda ákimdiginiń qaramaǵyna ótedi - V.Krylov
ASTANA. Shildeniń 20-sy. QazAqparat /Jasulan Amanbaıuly/ - Astana tóńiregindegi ormandy alqap qalanyń kommýnaldyq menshigine ótedi. Endi qala aınalasynda jasyl beldeýdi qurý jumystary «Astana ormany» memlekettik kommýnaldyq kásipornynyń (MKK) mindetine júktelmek.
Búgin «Astana ormany» MKK-niń ǵylymı-tájirıbelik ýchaskesin aralap qaıtqan Astana ákiminiń orynbasary Vasılıı Krylov, qazirgi tańda Astana qalasynyń balansyna berilgen jasyl beldeýdiń jalpy kólemi 16 myń gektardan asatyndyǵyn aıtty.
Eske sala keteıik, orman alqaby aýyl sharýashylyǵynyń mınıstrliginiń qaraýynda bolyp kelgen bolatyn. Qazirgi tańda QR Parlamenti qabyrǵasynda Orman Kodeksine ózgerister men tolyqtyrýlar engizý týraly zań jobasy talqylanyp jatyr. Ol boıynsha Qazaqstannyń orman qory túsiniginen «orman saıabaǵy» sanatyndaǵy ýchaskelerdi aıqyndap, Astana tóńiregindegi jasyl beldeýdi elordanyń kommýnaldyq menshigine qaldyrý máselesi túpkilikti sheshimin tabady.
Kóshpeli jıyn barysynda V.Krylov jasyl beldeýdi qurýdyń ekinshi kezeńi aıaqtalyp qalǵandyǵyn, endigi mindet qoldan ósirilgen ormannyń tabıǵı túrde ósip-ónýine jaǵdaı jasaý bolyp tabylatyndyǵyn atap ótti. Ol úshin ol jerde ǵalymdar aǵashtardy yqtyrma otyrǵyzý ádisin qoldanýda. Sonymen qatar orman qyzmetkerleri ondaǵy haıýanattar áliminiń damýyna úlesterin qosýda. «Astana ormany» kordony janynda qyrǵaýyl men buldyryq qustaryn ósiretin ferma salynǵan. 2010 jyly osy ádispen 10 gektardan astam orynǵa 26 myń túp uzaq jasaıtyn aǵash túrleriniń tuqymdaryn ekken. Qala ákiminiń orynbasary eki jarym aı ishinde ósip qalǵan shyrsha men emen kóshetterin ózi aralap kórdi.
