«Astana-Teplotranzıt» jylý úshin tólemder qalaı qalyptasatynyn túsindirdi

ASTANA. KAZINFORM — Jylý júıesi boıynsha esepteletin tólem mólsheri syrtqy aýanyń ortasha temperatýrasyna tikeleı baılanysty. Aýa temperatýrasy tómendegen saıyn turǵyn úılerde normatıvtik temperatýrany saqtaý úshin kóbirek jylý energııasy qajet bolady, bul túbirtekterdegi soma arqyly kórinis tabady, dep habarlaıdy «Astana-Teplotranzıt» AQ baspasóz qyzmeti.

Salystyrar bolsaq, qazirgi jylytý maýsymyndaǵy ortasha aýa temperatýrasy:

• 2025 jylǵy qarasha — 0,36 °C;
• 2025 jylǵy jeltoqsan — -8,1 °C;
• 2026 jylǵy qańtar — -14,3 °C.

— Osylaısha, jylýmen jabdyqtaý tarıfi kóterilgen joq. Aýa temperatýrasynyń tómendeýine baılanysty jylý tutyný kólemi obektıvti túrde artty, bul óz kezeginde túpkilikti qunynan áser etti. QR Azamattyq kodeksiniń 488-babyna jáne «Jylý energetıkasy týraly» zańǵa sáıkes, tólem naqty tutynylǵan energııa kólemi úshin júrgiziledi, — deıdi mamandar.

Jylý energııasynyń quny myna faktorlarǵa baılanysty:

• aýa raıy jaǵdaılary (syrtqy aýanyń ortasha aılyq temperatýrasy);
• jylý energııasyn esepke alý quralynyń bolýy jáne jaramdylyǵy;
• esepteý ádisi (esepke alý quraly boıynsha nemese eseptik ádispen);
• ystyq sý eseptegishteriniń kórsetkishterin ýaqytyly tapsyrý;
• jylý energııasyn tutyný kólemi.

Esepke alýdyń eki negizgi tásili bar:

• aspaptyq — jalpyúılik esepke alý quraldarynyń (eseptegishterdiń) derekteri negizinde;
• eseptik — eseptegishter bolmaǵan nemese ýaqytsha jaramsyz bolǵan jaǵdaıda bekitilgen normalarǵa sáıkes qoldanylady.

Jylý energııasyn tutyný kólemi sondaı-aq úıdiń tehnıkalyq sıpattamalaryna, ınjenerlik júıelerdiń jaı-kúıine, retteý avtomatıkasynyń bolýyna jáne turatyn adamdar sanyna baılanysty, bul ystyq sý shyǵynyna áser etedi.

Jylý energııasyn paıdalaný qaǵıdalarynyń 32-tarmaǵyna sáıkes, jalpyúılik esepke alý quraldaryna tehnıkalyq qyzmet kórsetý jáne olardy tekserý úıdi basqarý organdarynyń — MIB, PIK jáne basqa da qyzmet kórsetýshi uıymdardyń jaýapkershilik aımaǵyna jatady. Jaramdy eseptegishtiń bolýy naqty tutyný boıynsha tóleýge múmkindik beredi.

— Biryńǵaı tólem qujaty boıynsha tólemdi osy aıdyń 25-ine deıin júrgizý qajet. Osy kúnnen keıin túsken tólemder kelesi eseptik kezeńde eskeriledi. Jylýmen jabdyqtaý jáne esepteýler máselesi boıynsha «Astana-Teplotranzıt» AQ-ǵa myna mekenjaılar boıynsha júginýge bolady: Turan dańǵyly, 12 jáne Qajymuqan kóshesi, 8A. Elektrondyq poshta: [e-mail]. Call-ortalyq: [phone]; [phone]. Jumys kestesi: dúısenbi-juma 07:30–dan 19:00–ge deıin, senbi 09:00–den 14:00–ge deıin, — delingen kompanııa habarlamasynda.

Aıta keteıik, osy aıda kóptegen qazaqstandyqtyń kommýnaldyq tólem túbirtekterinde somalar ádettegiden joǵary bolyp shyqty. Mamandardyń aıtýynsha, bul tarıfterdiń kóterilýinen emes, sýyq aýa raıyna baılanysty jylý tutynýdyń artýy jáne QQS esebiniń ózgerýimen túsindiriledi.