«Astana-Teplotranzıt» jańa tutynýshylardyń júıege qosylýyna shekteý engizedi
Bul týraly qalalyq janarmaı-energetıka kesheni jáne kommýnaldyq sharýashylyq basqarmasynyń QazAqparat saýalyna joldaǵan jaýabynda aıtylǵan.
«Jylý kózderinde qýattyń tapshylyǵy týyndap turǵandyqtan, «Elektr stantsııalary men jelilerin tehnıkalyq paıdalaný qaǵıdalarynyń» 593-tarmaǵy boıynsha «Astana-Teplotranzıt» AQ qosymsha kózdi engizgenge deıin jylý tutynýshy qondyrǵylardyń tehnıkalyq ázirligi aktisin resimdeýge jáne jańa tutynýshylardy qosýǵa ýaqytsha shekteý engizedi», - delingen jaýapta.
Basqarmanyń málimeti boıynsha, 2022-2023 jyldardaǵy jylytý maýsymynda iske qosylatyn obektilerdiń málimdelgen sany 138 nysan bolyp otyr. Osy qajettilikti qanaǵattandyrý úshin ákimdik №1 jylý elektr ortalyǵynyń sý jylytý qazandyqtaryn gazǵa aýystyrǵan.
«Osylaısha qolda bar qýat mólsheri 50 Gkal/saǵ ulǵaıtyldy. Áleýmettik nysandar ortalyqtandyrylǵan jylytý júıesinen avtonomdy qazandyqtarǵa aýystyrylyp jatyr. Bári birigip 36 Gkal/saǵ jylý qýatyn tutynatyn 11 nysan avtonomdy júıege kóshiriledi.
Jylýmen jabdyqtaý júıesinde qýattyń ár kózge túrli mólsherde jetýin boldyrmaý úshin búkil nysandarǵa qajetti mólsherde ǵana jylý baǵyttaýǵa múmkindik beretin «shaıbalaý»tásili qoldanylmaqshy. Qazirgi tańda jospardaǵy 3561 osyndaı qondyrǵynyń 3468-i ornatyldy», - dep jazylǵan basqarmanyń málimetinde.