Astana – Temirtaý jáne Almaty – Qonaev joldarynda 8 myńǵa jýyq oqıǵa anyqtaldy
ASTANA. KAZINFORM – Astana – Temirtaý jáne Almaty – Qonaev baǵyttarynda jol jaǵdaıyn úzdiksiz baqylaıtyn beınebaqylaý júıesi pılottyq rejımde jumys istep tur. Joba iske qosylǵaly kameralar arqyly 8 myńǵa jýyq oqıǵa anyqtalǵan. Bul týraly «QazAvtoJol» UK» AQ basqarma tóraǵasy Darhan Imanashev Ortalyq kommýnıkatsııalar qyzmetinde ótken brıfıngte málimdedi.
Júıe joldaǵy jaǵdaı men kólik aǵynyn táýlik boıy baqylaýǵa, túrli oqıǵany der kezinde anyqtaýǵa múmkindik beredi. Anyqtalǵan jaǵdaılardyń barlyǵy boıynsha jol qyzmetteri tıisti shara qabyldaǵan.
Sonymen qatar kompanııanyń aqparattyq júıeleri navıgatsııalyq platformalarmen biriktirilgen. Endi jol qozǵalysyna ýaqytsha shekteý qoıylǵany nemese qaıta ashylǵany týraly málimetter tsıfrlyq servısterge jedel jiberilip, elektrondyq kartalarda kórsetiledi.
D. Imanashevtiń aıtýynsha, bul júrgizýshilerge sapar aldynda jol jaǵdaıyn tekserip, baǵytyn aldyn ala josparlaýǵa kómektesedi.
– Respýblıkalyq joldar týraly aqparatty táýlik boıy jumys isteıtin 1403 baılanys ortalyǵynan da alýǵa bolady. Ortalyq azamattardyń ótinishterin qabyldap, jol qyzmetterimen baılanysty qamtamasyz etedi, – dedi ol.
Buǵan deıin Qazaqstannyń aqyly joldaryna 56 lazerlik qurylǵy ornatylǵany jóninde jazdyq.
