Astana temirjoly vokzalynda 15 lotereıalyq termınal tárkilendi
ASTANA. QazAqparat - Astana temirjoly vokzalynda elordalyq memlekettik kirister departamentiniń qyzmetkerleri 15 lotereıalyq termınaldy tárkiledi.
«Astana qalasy boıynsha memlekettik kirister departamentiniń ekonomıkalyq tergeý qyzmeti oıyn bıznesi salasyn únemi baqylaýda ustaıdy. Oıyn avtomattary boıynsha kásipkerlik sýbektileri qyzmetiniń zańdylyǵy tekseriledi. Bul aqshany qabyldap, fıskaldy cheksiz utys pen lotereıa bıletterin bere alatyn elektrondy termınaldarǵa qatysty. Alaıda mundaı termınaldardy elordalyq temirjol vokzalynan kórýge bolady», - dedi Astana qalasy boıynsha memlekettik kirister departamentiniń baspasóz qyzmetinde.
Osylaısha, aǵymdaǵy jyly 29 shildede Gete kóshesi, 7 mekenjaıynda ornalasqan eski saparjaıdy tekserý kezinde 15 lotereıalyq termınal anyqtalyp, tárkilendi. Shildeniń basynda departament qyzmetkerleri osy jerden zańsyz 17 termınaldy áshkerelegen. Al ótken jyldyń jeltoqsan aıynda osyndaı 14 termınal tartyp alynǵan.
Vedomstvodan habarlaǵandaı, qazir tergeý amaldary júrgizilip jatyr.
Eske sala keteıik, oıyn bıznesi týraly zańda «oıyn mekemesiniń uıymdastyrýshysy ornatqan jáne qumar oıyn uıymdastyrý úshin paıdalanylatyn oıyn jabdyǵy (mehanıkalyq, elektrlik, elektrondy nemese basqa tehnıkalyq jabdyq) zańsyz» dep jazylǵan.
Buǵan eki aımaqta ǵana: Almaty oblysy Qapshaǵaı sý qoımasynyń jaǵalaýy men Aqmola oblysyndaǵy Býrabaıda tyıym salynbaǵan.
