«Astana - Temirtaý» avtojolynyń jańadan salynǵan alǵashqy 6,5 shaqyrymy qarasha aıynda ashylady
ASTANA. 29 qazan. QazAqparat - 2013 jyldyń shildesinde Qazaqstanda «Astana - Temirtaý», «Astana - Pavlodar» jáne «Almaty - Qapshaǵaı» baǵyttaryndaǵy avtojoldardy jańǵyrtý jumystary bastalǵan bolatyn. Bul atalǵan joldardy keńeıtip, birinshi tehnıkalyq sanatqa aýystyrý kólikterdi ótkizý qabiletin arttyryp, tasjoldardaǵy apatty oqıǵalardyń sanyn azaıtýǵa múmkindik beredi. Bul týraly Kólik jáne kommýnıkatsııa mınıstrliginiń baspasóz qyzmetinen habarlandy.
Mınıstrlik málimetine qaraǵanda, atalǵan joldyń uzyndyǵy -169 shaqyrym. Bul baǵyttaǵy jol alty ýchaskege bólingen. Búgingi kúni qurylys jumystary Aqmola jáne Qaraǵandy oblystaryndaǵy eki ýchaskede júrgizilýde. Uzyndyǵy 21 shm quraıtyn taǵy bir ýchaskeniń jobalaý-smetalyq qujattamasy ázirlenip, qazirgi ýaqytta merdigerdi anyqtaý úshin konkýrs jarııalandy. Qalǵan 3 ýchaskeniń jobalyq-smetalyq qujaty ázirlenýde. Jobalaý-izdestirý jumystaryn qarasha aıynda aıaqtaý josparlanǵan. Qurylys jumystary 2014 jyly bastalady. Osylaısha, keler jyly qurylys jumystary barlyq ýchaskede júrgiziletin bolady. Rekonstrýktsııa jumystarynyń nátıjesinde «Astana - Temirtaý» kúrejoly 4 jolaqty bolyp, 1 tehnıkalyq sanatqa jatqyzylady.
«Búgingi kúni 6,5 shm tsementti beton jabyndysy tóselgen. 10,3 shm jolda negizgi bóliginiń ústińgi qabaty tóselýde. Jaqyn ýaqytta beton tóseý jumystary bastalady. Sondaı-aq, jer qazý, topyraq úıý sekildi jer jumystary júrgizilýde. Bul jumystar aıaqtalǵan soń negizdemeniń ústińgi qabatyn tóseý jumystary bastalady», - delingen baspasóz baıanynda.
