Astana temir jol vokzalynda izdeýde júrgen 5 adam qolǵa tústi
ASTANA. QazAqparat - Astana qalasynyń temir jol vokzalyndaǵy jelilik polıtsııa bólimine kún saıyn 30-35 adam jetkiziledi, dep habarlaıdy Kóliktegi ІІD baspasóz qyzmetinen.
Olardyń basym bóligi ákimshilik quqyq buzǵandary, jasalǵan qylmysqa qatystylyǵy úshin, sondaı-aq, qujat tekserý kezinde ustalady.
Astana stansasyndaǵy ishki ister jelilik basqarmasynyń polıtsııa polkovnıgi D. Ábdikárimovtiń aıtýynsha, aǵymdaǵy jyldyń 9 aıynda 30 adam qabyldap-taratý oryndaryna, al 69-y Astana qalasyndaǵy beıimdeý ortalyǵyna tapsyrylǵan. Sondaı-aq, Astana stansasyndaǵy ishki ister jelilik basqarmasynyń qyzmetkerleri ártúrli qylmys jasaǵan 38 azamatqa izdeý salǵan. Búgingi tańda onyń 5-ýi anyqtalyp, tıisti organdarǵa berildi.
Máselen, jaqynda Astana qalasynyń temir jol vokzalynda jelilik bólim polıtseıleriniń jedel-izdestirý sharalary barysynda 24 jastaǵy Qaraǵandy qalasynyń turǵyny ustaldy. Tergeý barysynda onyń QR QK 175 «b» babynyń 1 bóligi boıynsha urlyq jasaǵany úshin Qaraǵandy oblysy Abaı aýdany ishki ister bólimi izdeý salǵan azamat ekendigi belgili boldy.
Jalpy, 2014 jyldyń basynan beri QR ІІM Kóliktegi ishki ister departamentiniń qyzmet etý aýmaǵynda, ıaǵnı temir jol men áýe kóligi nysanyndarynda qańǵybastyqpen jáne qaıyrshylyqpen aınalysqan kámelettik jasqa tolmaǵan 133 jasóspirim ustalyp, beıimdeý ortalyqtaryna jetkizildi.
Qabyldap-taratý oryndaryna turaqty meken-jaılary anyqtalmaǵan 439 azamat ornalastyryldy.
