Astana temir jol vokzaly turaǵyna mınıvender nege kirgizilmeıdi
ASTANA. QazAqparat - Astana qalasynyń jolaýshylar kóligi basqarmasy temir jol vokzalyndaǵy kólik turaǵyna mınıvenderdi kirgizýge nelikten tyıym salynǵanyn túsindirdi, dep habarlaıdy «QazAqparat» HAA tilshisi.
«Astananyń temir jol vokzalynyń janyndaǵy aqyly kólik turaǵynyń aýmaǵyna kirý nemese shyǵý Elordanyń eski vokzalyndaǵy erejelerge sáıkes retteledi. Ol erejeler boıynsha turaq qyzmetin paıdalanatyn kólik quraldarynyń júrgizýshilerine birshama shekteýler qoıylǵan», - delingen redaktsııanyń resmı saýalyna jaýap bergen basqarmanyń jaýabynda.
Júrgizilgen monıtorıngke sáıkes, kólik turaǵyna kiretin mınıvendenderdiń 99 paıyzy qalalar men oblystarǵa júretin zańsyz tasymaldaýshylar bolyp tabylady.
Sonymen qatar, basqarmanyń habarlaýynsha, Jolaýshylar kóligi basqarmasy men Ákimshilik polıtsııa basqarmasy arnaıy tehnıka men qyzmet kórsetetin kólikterden bólek, «D» kategorııasyndaǵy avtokólikterdi turaq aýmaǵyna kirýge tyıym salatyn jol belgileri ornatylýda.
