Astana-Tehran arasynda tikeleı áýe reısi ashylady

ASTANA. QazAqparat - 2017 jyly Astana-Tehran arasynda tikeleı áýe reısi ashylady. Bul týraly búgin Aqordada Iran Islam Respýblıkasynyń Prezıdenti Hasan Rýhanımen kelissózderden keıin birlesken málimdeme jasaǵan Elbasy Nursultan Nazarbaev aıtty, dep habarlaıdy QazAqparat.

«Búgin biz áýe qatynasy jóninde kelissózder júrgizdik. Meniń saparymnan keıin Almaty men Tehrannyń arasynda aptasyna úsh márte áýe kóligi ushatyn boldy. Qazir onyń tolýy 60 paıyzǵa jetip otyr. Endigi jyly Tehran-Astana arasynda áýe joly qatynasyn jasaımyz», - dep atap ótti Qazaqstan Prezıdenti.

Elbasy munyń aıasynda Qazaqstan men Iran vıza rejimin ońtaılandyrý, ózara týrızmdi yntalandyrý úshin naqty sharalardy qabyldaýǵa keliskenin basa aıtty.

«Oǵan kesirin tıgizip otyrǵan eki eldiń bankteri arasyndaǵy esep aıyrysý máselesi de nazardan tys qalǵan joq. Ony da sheshetin bolamyz», - dedi Nazarbaev.