«Astana taxi servise» kompanııasyna qatysty tergeý bastaldy

Búgin atalǵan másele Astana qalasy boıynsha Kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl jónindegi keńestiń otyrysynda qaraldy, dep habarlaıdy QazAqparat tilshisi.

Astana qalasy kólik qyzmetkerleri qaýymdastyǵynyń tóraǵasy Medet Qurmanovtyń aıtýynsha, osydan úsh jyl buryn taksoparkter osy salany damytý máselelerin kóterip, biryńǵaı taksı qyzmetin qurýdy usynǵan bolatyn. Osylaısha, «Astana taxi servise» JShS quryldy. Búginde atalǵan qyzmetke qosylǵan kompanııalardyń sany eki esege ósti. Al kólik quraldarynyń sany 700-ge deıin artty. «Astana taxi servise» olardyń bárine tapsyrystar berip otyrady.

«Osylaısha, kólik júrgizýshileri resmı túrde tabys taýyp júr. Alaıda qaladaǵy barlyq taksopartker naryqtyń tek 15 protsentin ǵana alyp otyr. Qalǵany - kóleńkeli bıznes. Sebebi qazir mobıldi qyzmet arqyly taksı shaqyrtý keńinen taralyp ketken. Endi, ótken jyly báskelestikti qorǵaý organdary «Astana taxi servise» kompanııasyna qatysty tergeýdi bastady. Olardyń oıynsha, kompanııa óz tarıfterin ornatyp, sonymen taksoparkterdi qyzmet kórsetýge mindetteıdi. Alaıda taksoparkter ol kompanııany ózderi qurdy. Sondyqtan tarıfterdi de ózderi bekitedi. Iá, bas kezinde qujattar durys rásimdelmegen shyǵar. Biraq oǵan qarap, kompanııany zań buzyp otyr deýge bolmaıdy», - dedi M.Qurmanov jýrnalısterge bergen suhbatynda.

Al «Astana taxi servise» JShS dırektory Oleg Fatıýhın qujatttarda ketken olqylyqty kórsetip berdi.

Onyń sózine qaraǵanda, kampanııa tarıfti bekitpeıdi. Tergeý kezinde de ony eshkim dáleldeı almady.

«Másele mynada, basynda bizde tájirıbe bolmady ma, kásibı zańgerlerdi de tartýǵa aqshamyz jetpedi. Sol kezde bizdiń taksoparktermen rásimdeıtin kelisimshartymyzǵa «Astana taxi servise tarıfti ornatýǵa jáne óz kózqarasy boıynsha ózgertýge quqyly» degen sóılem kirip ketken. Biraq kompanııanyń ol tarmaqty qoldanyp júrgenine dálel joq. Taksoparkter tarıfti ózderi usyndy. Biz sol boıynsha jumys isteımiz», - dep atap kórsetti O.Fatıýhın.

Alaıda Astana qalalyq Tabıǵı monopolııalardy retteý, básekelestikti jáne tutynýshylardyń quqyqtaryn qorǵaý departamenti «Astana taxi servise» JShS-inen bólek taksoparkterge qatysty taǵy bir tergeýdi bastap ketti. Sebebi qyzmetke qosylǵan taksoparkter tarıfti ózara kelisip aldy degen kúdik bar.

«Birinshi tergeýge sáıkes, «Astana taxi servise» JShS 13 taksokompanııaǵa biryńǵaı tarıf bekitkeni úshin aıyptalyp otyr. Ol jaıynda ekijaqty kelisimshartta da jazylǵan. Taksoparkterdiń ózderi de tarıfti «Astana taxi servise» bekitedi dep aıtyp otyr. Al ekinshi tergeý sol taksoparkterge qatysty. Olar baǵany ózara kelisip aldy degen kúdik bar. Biz olardyń bir-birine jibergen elektrondy hattaryn zerdelep shyqtyq. Sol jerde tarıfti ózara kelisý áreketteri anyq baıqalady», - deıdi departamenttiń bólim basshysy Dastan Sámen.

Aıta keteıik, tergeýdiń nátıjesinde «Astana taxi servise» JShS-ine iri kólemde aıyppul salynýy múmkin. Al taksoparkterdiń tarıfti ózara kelisip alǵany dáleldense, monopolııadan túsken tabys tárkilenedi. Tergeý taǵy eki aıǵa sozylady.

Osyǵan deıin ıAndeks taksıdiń baǵany negizsiz kóteretini týraly jazdyq.