Astana tarıhyn baıandaıtyn veb-saıt iske qosyldy
NUR-SULTAN. QazAqparat - Elimizdiń bas qalasynyń Astanadan Nur-Sultan atalýyna deıingi tarıhy baıandalatyn jańa formattaǵy veb-saıtiske qosyldy, dep habarlaıdy QazAqparat Elorda Info saıtyna silteme jasap.
«Maqsatymyz - bas qalamyzdyń keshegi jáne búgingi kúni týraly baıandaıtyn jańa veb-derekter jobasyn usyný. Sońǵy aı ishinde eleýli oqıǵalardyń kýási bolyp otyrmyz. Sonyń biri - elordaǵa Nur-Sultan ataýynyń berilýi. Bul qaı jaǵynan qarasaq ta - óte mańyzdy qadam. Bizdiń shyǵarmashylyq top biraz ýaqyt izdenip, jańa formattaǵy «Astana - Nur-Sultan» atty veb-derekter saıtyn jasap shyǵardy. Bul joba elimizdiń tarıhyna qysqasha mýltımedııalyq baǵyttaǵy sholý bolyp esepteledi. Egenmendik alǵan jyldardan osy kúnge deıingi tarıhymyzdy zamanaýı turǵyda taǵy bir túgeldeý», - dedi «Qazkontent» AQ-nyń basqarma tóraǵasy Dýman Qojahmetov.
Onyń sózinshe, joba jańa formatymen jáne júıeliligimen erekshelenedi.
«Sondaı-aq qysqa ári nusqa túrde berýge tyrystyq. Sebebi uzaq tekst pen vıdeony eshkimniń kórgisi kelmeıdi. Tarıh - búginimiz ben bolashaǵymyz úshin qundy. Elimizdiń tarıhy men onyń astanasynyń qalyptasýy Tuńǵysh Prezıdent - Elbasy Nursultan Nazarbaevtyń esimimen tyǵyz baılanysty. Elbasynyń qala men onyń damýy tarıhyna sińirgen eńbegi zor. Osy turǵyda jańa jobanyń mańyzy da zor bolmaq», - dedi ol.
Aldaǵy ýaqytta veb-derek jobasy tarıhymyzda oryn alatyn mańyzdy oqıǵalarmen tolyqtyrylyp otyrady. Jáne ondaǵy negizgi erekshelik saıttyń júıeli jáne jańa formatta bolýy, sondaı-aq qysqa ári nusqa usynylýynda.
«Joba 2016 jyly qolǵa alynǵan bolatyn, onyń jasalýyna 10 adam qatysty. Veb-derekter saıtynda elorda tarıhyna qatysty buryn-sońdy jarııalanbaǵan 100 foto jarııalandy. Bul Astana jáne Almaty qalasynyń arhıvterimen birige jumys isteýimizdiń nátıjesi», - dedi D.Qojahmetov.
