«Astana Tańdaýy» baıqaýynyń jeńimpazdary anyqtaldy
ASTANA. 25 maýsym. QazAqparat - Búgin tún jarymda astana.kz saıtynda «Astana Tańdaýy» baıqaýynyń úmitkerlerine daýys berý aıaqtaldy, dep habarlaıdy elordanyń resmı saıtynan.
«Astana Tańdaýy» baıqaýy qala turǵyndarynyń júregine jol taýyp, úzdik muǵalim, dáriger, ınspektor, qurylysshy, jolshy, qoǵamdyq kólik júrgizýshisi jáne energetıkke daýys berildi. Baıqaý 15 kúnde 87 252 adamnyń daýysyn jınady.
Buǵan deıin habarlaǵanymyzdaı, eń kóp daýys jınaǵan jáne turǵyndardyń belsendi qatysqany ol - muǵalim atalymy boldy. «Úzdik pedagog» ataǵynyń ıegeri Raıymbek batyr atyndyǵy №50 «Qazǵarysh» mektep-lıtseıiniń muǵalimi Rabıǵa Tashkenbaıqyzy Imanqulova boldy. Oǵan 21 562 adam daýys beripti.
3596 daýys 23 jyldyq eńbek ótili bar «Astana ákimdiginiń №1 Qalalyq aýrýhanasynyń» qyzmetkeri Marat Qarsybekuly Abdýlovqa berildi. Sóıtip, ol «Úzdik dáriger» atalymynda jeńimpaz tanyldy.
«Astana-Jylýtranzıt» AQ-nyń Retteý jáne tutynýshylardy esepke alý qyzmetiniń bastyǵy Raýza Júnisbekqyzy Kákimovanyń da 31 jyldyq eńbek ótili bar. Ol «Energetık» atalymy boıynsha 5 317 daýys jınap, úzdik atandy.
«№1 Avtobýs parkiniń» qoǵamdyq kólik júrgizýshisi Qanat Hamzauly Qultaev óziniń 24 jyl sanaly ǵumyryn osy mamandyqqa arnaǵan jan. Qalalyqtardyń pikirinshe, ol da óz mamandyǵynyń úzdigi bolyp tanyldy. Oǵan 315 adam daýys beripti.
Jolshy Vıacheslav Vıktorovıch Shevchenko bul baıqaýda 72 daýys aldy. Osy jetistikpen «QazaqAvtojol» Aqmola fılıalynyń qyzmetkeri, 32 jyldyq eńbek ótili bar qurmetti azamat «Úzdik jolshy» atandy.
Al úzdik qurylysshyǵa - 1 734 adam daýysyn bergen. Mundaı ataqqa «Altyn HHI» JShS qyzmetkeri Súndet Іzbasaruly Úmbetov ıe boldy.
Astana qalasynyń «OP -14 SRÝ VD» mekemesiniń qyzmetkeri 24 jastaǵy Murat Baltanbekuly Shırtaev óziniń jastyǵyna qaramastan bolashaǵynan kóp úmit kúttiredi. Ol 1341 daýys jınady.
Jeti mamandyq úzdik ókilderiniń tarıhy búkil qalaǵa belgili boldy. Ótinimder tek Astanadan ǵana kelgen joq, Reseı men Ýkraınadan alǵys bildirgen shákirtter men patsıentter, úzdik qurylysshy salǵan úılerde turatyn adamdar isine jaýapty, eńbekqor jandar týraly áńgime shertti.
Bıylǵy jylǵy jańalyqtyń biri daýystardy adamnyń qatysynsyz kompıýterlik baǵdarlama sanaıdy. Astana ákimdigi saıtyndaǵy halyqtyq daýys berý júıesi tek bir adamǵa bir ret elektrondy daýys berýge múmkindik týǵyzady. Osy turǵydan alǵanda, daýys berý shynaıy jáne ádiletti bolyp tabylady.
Eń kóp jáne belsendi muǵalim atalymy boıynsha baıqaýǵa 58 pedagog usynyldy. Ekinshi orynda 32 medıtsına qyzmetkeri «úzdik» ataǵyna usynylsa, úshinshi orynǵa 24 úmitkerge daýys bergen energetıkter shyqty. Sonymen qatar, baıqaýǵa 17 ınspektor, 16 qurylysshy, 14 jolshy, 9 qoǵamdyq kólik júrgizýshisi qatysty.
Jalpyqalalyq «Astana Tańdaýy» baıqaýynyń jeńimpazdaryna halyq súıispenshiliginen basqa, materıaldyq júldeler tapsyrylady. Olardy marapattaý 6 shilde kúni Kongress-hollda ótedi.
