«Astana tańdaýy» baıqaýy qajet mamandyqtyń bedelin arttyrady

Osydan bir jyl buryn Astana qalasyndaǵy №10 mektep-gımnazııanyń bastaýysh synyp muǵalimi Marııa Shokýbasova óz shákirtteriniń ata-analary onyń kandıdatýrasyn «Astana tańdaýy» baıqaýyna usynǵandyǵyn estip, tańǵalǵany bar. Tipti, bul usynysty áriptesteri jappaı qoldaǵanda, oǵan buryn bitirip ketken oqýshylarynyń ata-analary alǵashqy muǵalimderin umytpaı daýys bergende onyń tańǵalysy eselenip, boıyn bir shattyq sezimi bıledi. Halyqtyń tańdaýynan keıingi óz ómirindegi ózgerister týraly ol astana.kz. saıtyna áńgimelep berdi.

- «Astana tańdaýy» baıqaýyndaǵy jeńisińiz jumysyńyzǵa qalaı áser etti? Juldyz aýrýyna ushyraǵan joqsyz ba?

- Men óz jumysyma óte syn kózben qaraımyn. Maqtanǵanym emes, únemi ózime-ózim kóńilim tolmaı júredi. Birde avtobýsta kele jatyp, óz mamandyǵynyń úzdigin tańdaıtyny týraly habarlandyrýdy oqyp, osyndaı paıdaly bastamaǵa óte qýanǵanym bar. Meniń ákem keńestik dáýirde ozat mehanızator bolyp, kóptegen marapattarǵa ıe boldy. Ol kezde jumysshy mamandyǵyn, muǵalimderdi aıyryqsha qurmetteıtin. Olar qoǵamda bedelge ıe boldy. Qazir de halyqtyq daýys berý jolymen jeńimpazdy anyqtaý - bul ádildik dep oılaımyn.

- Búgingi kúni ustazdyq etýden bólek, nemen aınalysasyz?

- Sarapshy retinde oqýlyqtar ázirleýge qatysamyn. Ǵalymdar teorııasyn qurady, al biz tájirıbeden ótkizemiz. Oqýlyqtardyń qyzyqty ári tanymdy bolýyna mán beremiz. Balamen dosyńdaı áńgimelesý kerek. Keı áriptesterim maǵan bala sııaqtysyń deıdi, buǵan únemi balalarmen jumys jasaıtynym sebep bolar. Degenmen, ózimdi qatal muǵalim retinde sezinemin.

- Muǵalim bolý bala kúngi armanyńyz ba edi?

- Joq, bala kúnimde esepshi bolǵym keletin. Alaıda, ádebıet pániniń muǵalimi sabaqty qyzyqty etip ótkizetin, únemi soǵan elikteıtinmin.

- Baıqaýda jeńip shyqqan soń áıgili bola bastadyńyz, sizben sanasa bastady. Bilim berý salasynda qandaı ózgeristerdiń bolǵanyn qalaısyz?

- Qaǵazbastylyqtan arylý kerek, óıtkeni qaǵaz toltyrýǵa kóp ýaqyt ketedi. Muǵalimder ýaqytynyń basym bóligin esep berýmen ótkizedi. Jazýdy azaıtyp, onyń ornyna shyǵarmashylyqqa kóp ýaqyt bólý kerek. Muǵalimniń jumys isteýine jaǵdaı jasap, onyń bedelin kóterý kerek.

«Astana Tandaýy» 2013 baıqaýyn uıymdastyrýshylar «Pedagog», «Qoǵamdyq kólik júrgizýshisi», «Ýchaskelik ınspektor», «Dáriger», «Energetık», «Jol jóndeýshi» jáne «Qurylysshy» salalarynyń eń úzdik mamandaryn izdeıdi. Eger de tanysyńyz jaıly baıandaǵyńyz kelse, myna meken-jaıǵa habarlasyńyz: 010000, Astana qalasy, Beıbitshilik kóshesi, 25-úı, 401-kabınet nemese elektrondyq poshta astana-tandauy-2013@mail.com . Egjeı-tegjeıli aqparat alý úshin myna telefondarǵa habarlasyńyz 8 (7172) 910-842, 910-845 (faks).