«Astana Tańdaýy-2014» jeńimpazdary memlekettik marapattarǵa ıe bolady

Bul týraly búgin marapattaý rásiminde Astana ákimi Imanǵalı Tasmaǵambetov málim etti.

«Biz baıqaý jeńimpazdaryn memlekettik nagradalarǵa usyndyq. Sizderdi astanalyqtar tańdaǵanyn eskere kele memlekettik baıqaý komıssııasy sheshim qabyldap, nagrada óz ıesin tabady dep oılaımyn», - dedi ákim.

Baıqaý 2 kezeńde ótti. Synda 195 nomınantqa 250 ótinish kelip tústi. Eń kóbi muǵalimder - 65 nomınant, ekinshi orynda energetıkter - 39, úshinshi - dárigerler (31 nomınant). Daýysty kóp jıǵandar jeńimpaz atandy. Bıyl 160 myńnan astam daýys berildi. Daýys berý úrdisi elorda ákimdiginiń resmı saıtynda júrgizilgen bolatyn. Bir ip-adres arqyly bir-aq ret daýys berý múmkin boldy.

«Joba maqsaty - úlgi bolarlyq Astana turǵyndaryn taýyp, olar týraly baıandaý. Aǵymdaǵy jyly jobany «Ómirdi jaqsarta alatyndardy ata» uranymen júzege asyrdyq. Bul sózder kóp nárseni ańǵartady», - dedi Imanǵalı Tasmaǵambetov.

Jeńimpazdar 7 atalym boıynsha anyqtaldy: «úzdik muǵalim» - «Astana daryn» ǵylymı-tájirıbelik ortalyǵynyń dırektory Maıra Qurmanbaeva, «úzdik dáriger» - №1 qalalyq aýrýhananyń joǵary sanattaǵy ýrolog-dárigeri Kırıll Chıcherov, «úzdik jol salýshy» - «Progress.KZ» JShS ınjeneri Bekzat Múseev, «polıtsııanyń úzdik ýchaskelik ınspektory» - Baýyrjan Taýmahanov, «úzdik energetık» - Astana qalasynyń energetıka basqarmasy energııamen qamtý bóliminiń jetekshisi Oljas Işanov, «Úzdik qurylysshy» - «KompanııaBaı-Tan» JShS dırektory Erkin Omarov jáne «qoǵamdyq kóliktiń úzdik júrgizýshisi» - Serik Adaev (№ 1 Avtobýs parki).