«Astana Tańdaýy-2014» baıqaýynda ashyq halyqtyq daýys berý boıynsha rekord ornatyldy
ASTANA. QazAqparat - Elordada 1 maýsymda «Astana Tańdaýy-2014» baıqaýynda ashyq halyqtyq daýys berý bastaldy. Bul týraly astana.kz saıtyna «Báıterek» halyqaralyq medıa ortalyǵynan habarlady. Alǵashqy eki táýliktiń ishinde saıtta 2223 adam daýys bergen.
Baıqaýǵa qatysýǵa ótinishter qabyldaý sáýir aıynan 31 mamyrǵa deıin júrgizildi. Osy ýaqyt ishinde 250 ótinish kelip tústi. Sonyń ishinde 195 nomınant iriktep alyndy, olar daýys berýge qatysýda.
Eń kóp ótinish muǵalimderden kelip túsken - 65, ekinshi orynda energetıkter - 39, úshinshi - dárigerler - 31, sodan keıin qurylysshylar - 25, júrgizýshiler - 14, ýchaskelik polıtsııa ınspektorlary - 13 jáne jol jóndeýshiler - 8.
Daýys berýge tek tirkelgen paıdalanýshylar ǵana qatysa alady. www.astana.gov.kz saıtynda daýys berý kezeńinde ár atalym boıynsha bir úmitkerge bir ret qana daýys berýge bolady. Daýys berý paraqshasynda qatysýshylar ár sanat boıynsha alfavıt boıynsha jazylǵan.
Eske salaıyq, «Astana Tańdaýy» baıqaýynyń maqsaty qala turǵyndarynyń pikirinshe úzdik maman ıelerin: pedagogty, qoǵamdyq kólik júrgizýshisin, ýchaskelik ınspektordy, dárigerdi, energetıkty, jol jóndeýshi men qurylysshyny anyqtaý.
Baıqaý jeńimpazdary halyqtyń tanymyna ıe bolady jáne Astana qalasynyń ákimi olarǵa kýbok pen gramota tabys etedi. Sonymen qatar, jeńimpazdar týraly shaǵyn derekti fılm túsirilip, fotosessııa uıymdastyrylady, elorda kóshelerinde úzdik maman ıeleriniń beınesi men esimderi jazylǵan bılbordtar paıda bolady.
