«Astana — Taldyqorǵan» jańa temirjol baǵyty iske qosyldy
ASTANA. KAZINFORM — Poıyz kúnara qatynaıdy, jol júrýge shamamen 28 saǵat ýaqyt ketedi, dep habarlaıdy Kólik mınıstrliginiń baspasóz qyzmeti.
2026 jylǵy 10 sáýirde Taldyqorǵan qalasynda «Astana — Taldyqorǵan» jańa jolaýshylar temirjol baǵytynyń iske qosylýy ótti.
Saltanatty is-sharaǵa Kólik mınıstrligi Temirjol jáne sý kóligi komıteti tóraǵasynyń orynbasary Eldos Nestaı, Jetisý oblysy ákimdiginiń ókilderi, QR Parlamenti Májilisiniń depýtattary, «Jolaýshylar tasymaly» AQ basshylyǵy jáne sala ókilderi qatysty.
Іs-shara barysynda Eldos Nestaı jańa baǵyttyń iske qosylýy óńirdiń kólik qoljetimdiligin arttyrýǵa, óńiraralyq baılanysty damytýǵa jáne jolaýshylar tasymaly qyzmetiniń sapasyn jaqsartýǵa baǵyttalǵanyn atap ótti.
Jańa baǵyt elorda men Taldyqorǵan qalasy arasyndaǵy turaqty qatynasty qamtamasyz etip, halyq úshin qosymsha qolaılylyqtar jasap, óńirdiń áleýmettik-ekonomıkalyq damýyna oń áserin tıgizedi.
Poıyz quramynda otandyq óndiriste shyǵarylǵan jańa jolaýshylar vagondary qarastyrylǵan. Bul — vagon parkin jańartý jáne ulttyq mashına jasaý salasyn qoldaý baǵytyndaǵy júıeli jumystyń bir bóligi.
— Poıyz kúnara qatynaıdy, jol júrý ýaqyty shamamen 28 saǵatty quraıdy. Bir baǵyttaǵy syıymdylyǵy — 88 jolaýshy. Halyq tarapynan suranys artqan jaǵdaıda, poıyz quramyndaǵy vagondar sanyn ulǵaıtý máselesi qarastyrylatyn bolady, — delingen habarlamada.
Osyǵan deıin Astana – Omby poıyzynyń vagondary jańarǵanyn jazdyq.
