Astana-Taldyqorǵan baǵytyndaǵy ushaq aýa raıynyń qolaısyzdyǵyna baılanysty ushpaı qaldy

TALDYQORǴAN. KAZINFORM - Búgin Astana - Taldyqorǵan baǵytyndaǵy ushaqtyń kesteden keshigýine baılanysty áleýmettik jelige jolaýshylardyń narazylyǵy jarııalanǵan edi. «Jetisý» áýekompanııasy jaýap berdi.

Áleýmettik jelide Astana áýejaıynda Taldyqorǵanǵa jete almaı turǵan jolaýshylardyń narazylyǵy jarııalandy. Jazbada «Qazaq AIR» áýekompanııasynyń ókili Taldyqorǵan qalalyq áýejaıynyń ushaqty qabyldaýǵa daıyn emes ekenin aıtady.

Al «Jetisý» áýekompanııasyna jaýapty basshylar ushaqty qabyldaýǵa tolyq daıyn ekenin, reıstiń keshigý sebebin aýa raıynyń qolaısyzdyǵynan dep túsindirdi.

«Ushaqtardy muzdan tazartýǵa arnalǵan suıyqtyqtyń joq ekendigi jáne arnaıy kólikterdiń jumysqa jaramsyzdyǵy týraly áleýmettik jelide jarııalanǵan málimettiń shyndyqqa janaspaıdy. Ózderińiz kórip turǵandaı, avtotehnıka jumysqa jaramdy, otalyp tur jáne muzdan tazartýǵa arnalǵan suıyqtyqpen qamtamasyz etilgen. „Astana-Taldyqorǵan“ baǵytyndaǵy ushaqty qolaısyz aýa-raıy men tańerteńnen beri jaýyp turǵan qardan ushý jolaǵynyń kórinbeýine baılanysty „Qazaq Air“ áýekompanııasy áýe reısin toqtatýǵa májbúr boldy», — dedi «Jetisý» áýe kompanııasy prezıdentiniń mindetin atqarýshy Jaıdarly Qudaıbergenov.

Aıta keteıik Taldyqorǵan áýejaıy aptasyn úsh kún: sársenbi, juma, jeksenbi kúnderi Astanadan keletin ushaqtardy qabyldaıdy.

Eske salaıyq osyǵan deıin Ortalyq Azııadaǵy eń bıik sarqyramaǵa aparatyn jol jóndeletinin jazǵanbyz.