Astana taqyrybyndaǵy úzdik jýrnalıstik jumystarǵa konkýrs bastaldy
ASTANA. KAZINFORM — Buqaralyq aqparat quraldary qyzmetkerleri kúni men Astana kúnine oraı elordada Astananyń damýy týraly úzdik jarııalanymdar, reportajdar men sıýjetterge arnalǵan dástúrli baıqaý jarııalandy. Bul týraly Astana qalasynyń ákimdigi málim etti.
— Baıqaýdy Astana qalasynyń Іshki saıasat basqarmasynyń qoldaýymen Qalalyq kommýnıkatsııalar qyzmeti uıymdastyrady. Oǵan Qazaqstannyń barlyq jýrnalısi qatysa alady. Baıqaýǵa Astana týraly memlekettik jáne orys tilderinde 2025 jylǵy 1 maýsym men 2026 jylǵy 16 maýsym aralyǵynda jarııalanǵan nemese efırge shyqqan materıaldar qabyldanady, — delingen habarlamada.
Ár qatysýshy baıqaýǵa bir ǵana materıal jáne tek bir nomınatsııa boıynsha usyna alady.
Baıqaý kelesi nomınatsııalar boıynsha ótkiziledi:
- «Úzdik jýrnalıst-taldaýshy» — Astananyń áleýmettik-ekonomıkalyq jáne mádenı damýyna arnalǵan, baspa basylymdarynda jarııalanǵan saraptamalyq materıaldar;
- «Úzdik sholýshy» — ınternet-basylymdarda jarııalanǵan Astananyń áleýmettik-ekonomıkalyq damýy týraly materıaldar, sondaı-aq zańdylyq, qoǵamdyq tártip, vandalızm, nashaqorlyq, lýdomanııa jáne elordadaǵy ózge de áleýmettik máselelerge qatysty jarııalanymdar;
- «Úzdik radıoreportaj» — Astana týraly radıomaterıaldar;
- «Úzdik televızııalyq sıýjet» — ýrbanıstıka, qoǵamdyq tártipti saqtaý, vandalızmniń, nashaqorlyqtyń, lýdomanııanyń aldyn alý jáne ózge de keleńsiz qubylystardy qamtıtyn qala ómiri týraly telesıýjetter;
- «Úzdik mobılograf» — mobıldi túsirilim arqyly ázirlengen megapolıs ómiri týraly beınerolıkter;
- «Aerofoto jáne ushqyshsyz ushý apparatyn paıdalana otyryp túsirilgen elorda týraly úzdik beınesholý» — qalanyń sáýlettik kelbetin, ınfraqurylymdyq damýyn, qoǵamdyq keńistikterin jáne tirshilik tynysyn kórsetetin aerofoto túsirilim negizindegi beınematerıaldar;
- «Jasandy ıntellekt kómegimen ázirlengen elorda týraly úzdik vıdeo» — Astananyń damýyn, sáýletin, qoǵamdyq keńistikterin, áleýmettik bastamalaryn jáne qalalyq ortasyn kórsetetin jasandy ıntellekt tehnologııalary arqyly jasalǵan beınematerıaldar;
- «Úzdik fotoreportaj» — Astananyń zamanaýı kelbetin, qarqyndy damýyn, qalalyq ómirin, sáýlettik ereksheligin jáne megapolıs yrǵaǵyn beıneleıtin fotojumystar. Negizgi nazar kórikti oryndarǵa, qoǵamdyq keńistikterge, mádenı is-sharalarǵa, abattandyrylǵan aýdandar men urban-mádenıetke aýdarylady;
- Áleýmettik jelilerdegi úzdik materıal — Facebook, Instagram jáne TikTok jelilerindegi tanymal toptar men paraqshalarǵa arnalǵan arnaıy nomınatsııa.
Jeńimpazdardy elordadaǵy belgili jýrnalıster, medıa-sarapshylar men sala ókilderinen quralǵan komıssııa anyqtaıdy. Úzdik jumystar aqshalaı sertıfıkattarmen marapattalady: birinshi orynǵa — 1 mıllıon teńge, ekinshi orynǵa — 700 myń teńge, úshinshi orynǵa — 500 myń teńge tabystalady.
Ótinimder 2026 jylǵy 16 maýsymǵa deıin baq.baikauy@gmail.com elektrondy poshtasy arqyly qabyldanady.
Qosymsha aqparatty: 8 778 603 90 94 telefony arqyly alýǵa bolady.
