Astana taǵy da álemdik tsırk óneriniń ortalyǵyna aınalady
ASTANA. 4 maýsym. QazAqparat - Astana kúni qarsańynda elordada álemniń úzdik tsırk ártisteriniń basyn qosatyn halyqaralyq festıvaldi ótkizý dástúrge aınaldy.
«Azııa jańǵyryǵy» Halyqaralyq tsırk festıvali tsırk óneriniń ortalyǵy retinde mereıtoılyq elordany tanyta túsýde. Uıymdastyrýshylardyń aıtýynsha, festıval baǵdarlamasy Qazaqstannyń halyqaralyq deńgeıdegi mádenı jetistikteriniń birine aınalmaq. Bul týraly Astananyń 15 jyldyǵyna daıyndyq jáne ony ótkizý jónindegi medıa-shtabtan habarlady.
Elordanyń 15 jyldyq mereıtoıyna arnalǵan «Azııa jańǵyryǵy» Halyqaralyq tsırk festıvali aıasynda Astanalyq tsırk qala turǵyndary men qonaqtaryna álemdik deńgeıdegi úzdik ártisterdiń qatysýymen biregeı baǵdarlama usynýdy josparlaıdy. Onyń ishinde Qazaqstan, Reseı, Italııa, Belarýs, Germanııa, Latvııa, Ýkraına, Ózbekstan jáne Qytaıdyń úzdik tsırk nómirleriniń jıyntyǵy qarastyrylady. Festıval baǵdarlamasynda áýe gımnasshylary, attraktsıondar, ekzotıkalyq jan-janýarlar, sheber jonglerler, akrobattar jáne saıqymazaqtar bar.
Festıvaldiń qazylar alqasynyń quramynda Italııa, Belarýs, Ýkraına, Germanııa, Qytaı, jáne TMD elderindegi tsırk óneriniń tanymal tulǵalary bar. Uıymdastyrýshylardyń pikirinshe, «Azııa jańǵyryǵy» Halyqaralyq tsırk festıvali tsırk óneriniń has sheberleri men jankúıerleriniń nazaryn ózine taǵy da aýdaratyn bolady.
