Astana sýyq, mınıstrler de aýyrady - B.Shárip
ASTANA. QazAqparat - Qazaqstan Respýblıkasy Prezıdent isteri basqarmasynyń medıtsınalyq ortalyǵyna qarasty aýrýhana bas dárigeriniń strategııalyq damý jónindegi orynbasary Berik Shárip QazAqparat tilshisimen áńgilemese otyryp, negizinen memlekettik sheneýnikterge arnalyp salynǵan bul aýrýhana qarapaıym halyqqa da sapaly qyzmet kórsetip otyrǵanyn aıtyp berdi.
«Prezıdent isteri basqarmasynyń aýrýhanasy bolǵandyqtan, biz memlekettik qyzmetkerlerdi qabyldaıtynymyz anyq. Alaıda, byltyr, 18 naýryz kúni osy aýrýhanany asha otyryp, Memleket basshysy jańa tehnologııasy tolyp turǵan, ınnovatsııaǵa súıengen bul aýrýhana qarapaıym, halyqqa da qoljetimdi bolsyn dep tapsyrma bergen bolatyn. Sondyqtan, densaýlyq saqtaý jáne áleýmettik qorǵaý mınıstrligimen kelisimshart jasasyp, qarapaıym halyqqa, ıaǵnı, respýblıkanyń eresek tulǵalaryna qyzmet kórsetetin boldyq. Byltyr 9 aıda 4 myńnan asa operatsııa jasasaq, sonyń kóbinde memlekettik qyzmetkerler emes, qarapaıym halyq kómek alǵan»,-dedi B.Shárip bizben áńgimelese otyryp.
Onyń aıtýynsha, aýrýhanada tipti sheteldik naýqastarǵa da qyzmet kórsete alady eken. Árıne, tegin emes.
«Aýrýhanadaǵy qyzmet qunyna toqtalatyn bolsaq, biz Qazaqstandaǵy aýrýhanalardyń barlyǵyna bench-markıng júrgizdik. Sondyqtan, bizdiń aýrýhanadaǵy baǵa elimizdegi basqa kez kelgen ortalyqtan, memlekettik, jekemenshik aýrýhanalardan qymbat baǵa suramaıdy»,-degen B.Shárip qyzmet alýdyń ortasha qunyn jarııa etken joq.
Memlekettik qyzmetker retinde mınıstrler men vıtse-mınıstrler «sheneýnikterge arnalǵan» aýrýhanaǵa qanshalyqty jıi keledi degen suraqqa ol: «mınıstrlikterdiń basshylary, vıtse-mınıstrler, bári de bizdiń emhanada qaralady. Bárimiz adambyz ǵoı. Astananyń qandaı sýyq ekenin bilesizder, sondyqtan, sheneýnikter de aýyryp, bizdiń emhanaǵa keledi. Al, biraq, aq halattylardyń beretin Antyna sáıkes, men ol kisilerdiń aty-jónin aıta almaımyn. Biraq aıtarym, sheneýnikter shetelde emes, bizdiń aýrahanada, basqa da qarapaıym halyqpen birge em qabyldaıdy» dep jaýap berdi ol.
