Astana sý qoımasynda kúshti jel alyp ketken 2 serfıngshi qutqarýshylardy shaqyrýǵa májbúr boldy
ASTANA. KAZINFORM - Aqmola oblysy Arshaly kentindegi Astana sý qoımasynda serfıng teýip júrgen eki jigit qutqaryldy, dep habarlaıdy QR Tótene jaǵdaılar mınıstrliginiń baspasóz qyzmeti.
Baspasóz qyzmetiniń málimetterine qaraǵanda olar 1997 jáne 1998 jyly týǵan eki jigit kúshti jel saldarynan óz betinshe jaǵaǵa qaıta almaı qalǵan jáne, 112 nómiri arqyly kómek suraǵan.
- Oqıǵa ornyna jedel jetken qutqarýshylar olardy jaǵadan 20 metr qashyqtyqta taýyp, aman-esen jaǵaǵa jetkizdi. Olarǵa medıtsınalyq kómek qajet bolǵan joq,-delingen habarlamada.
TJM azamattardy sý aıdyndarynda qaýipsizdik sharalaryn saqtaýǵa shaqyrady.
Osyǵan deıin qutqarýshylardyń Bozjyra mańynda balshyqqa batqan eki týrıstik avtobýsty shyǵarǵany týraly jazdyq.
