Astana sý arnasynyń kárizden ýlanǵan taǵy bir qyzmetkeri aýrýhanada
NUR-SULTAN. QazAqparat - «Astana Sý Arnasynyń» ýlanyp, aýrýhanaǵa jetkizilgen qyzmetkeriniń jaǵdaıy belgili boldy. Eske sala keteıik, mekeme qyzmetkerleriniń tórteýi óndiristegi oqys oqıǵadan qaza tapqan, dep habarlaıdy QazAqparat.
«Naýqasty jedel járdem №1 qalalyq aýrýhanaǵa jetkizgen. Jaǵdaıy turaqty, esin biledi. Basy aýyratynyn aıtady, jóteledi. Aýrýhananyń toksıkologııa bólimine jatqyzyldy. Dıagnozy: «kúkirtti sýtekten ýlaný» (metan). Aýyrlyq deńgeıi ortasha. Óndiriste oqys oqıǵa bolǵan», - deıdi Nur-Sultan qalasy ákiminiń baspasóz hatshysy Elvıra Júrgenbaeva.
Buǵan deıin «Astana sý arnasynyń» alty qyzmetkeri metan gazynan ýlanyp, tórteýi qaza tapqanyn habarlaǵan edik.
«Jumysshylardyń biriniń mazasy ketip, esinen tanyp tsılındrdiń ishine qulap tústi. Ekinshisi oǵan kómektesemin dep tehbaspaldaqpen tómen túsip, ol da esinen tanyp qaldy. Artynan úshinshisi, keıin taǵy bireýi túsken», - degen edi TJK tóraǵasy Vladımır Bekker.
Ákimdiktiń habaryna qaraǵanda, qaza tapqandar 1988, 1993, 1995, 1967 jyldary týǵan jumysshylar.
«6 adam jumys istegen, sonyń 4-eýi qaza tapqan. Jigitterdiń biriniń artynan biri qulaǵanyn kórgen júrgizýshi de olarǵa kómektesemin dep, ózi de qaza tapty», - deıdi E. Júrgenbaeva.
