«Astana sý arnasyna» aıyppul salyndy
NUR-SULTAN, QazAqparat – Elordada turǵyndarynyń aýyzsýdyń jaǵymsyz ıisine qatysty shaǵymdary boıynsha tekserý júrgizilidi. Bul týraly Taýarlar men qyzmetter qaýipsizdigi jáne sapasyn baqylaý departamentiniń basshysy Sádýaqas Baıǵabylov aıtty, dep habarlaıdy QazAqparat.
Departamenttiń habarlaýynsha, aýyzsýdy jospardan tys zerthanalyq zertteý jumystary 21 qyrkúıekte bastalǵan.
«26 qyrkúıekte áleýmettik jelidegi elordalyq qubyrdaǵy aýyzsý sapasyna qatysty departamentke E-gov portaly arqyly jazbasha shaǵymdandy», - deıdi ol.
Departament mamandary sý jınaıtyn jáne sý tazartý qurylǵylaryn, sondaı-aq sý taratqysh torapty teksergen.
«Jaz mezgilinde sýdyń qarqyndy aǵýyna baılanysty sý qoımasyndaǵy sý deńgeıi 270 mln tekshe metrge deıin tómendep ketken. Jyldyń jyly mezgilinde, ásirese qyrkúıek aıynda sý deńgeıiniń tómen bolýy baldyrlardyń, fıtoplanktonnyń qarqyndy ósýine jáne olardyń «geosmın» zatyn bólip shyǵarýyna yqpal etti. Bul sýda jaǵymsyz ıis paıda bolýyna ákelgen. Astana sý arnasy» qosymsha sharalar qabyldap, koagýlıant kontsentratsııasyn joǵarylatý jáne sińirgish zat mólsheriniń artýy ıisti qalypqa keltirýge múmkindik berdi. Zerthanalyq zertteý júrgizý kezinde aýyzsý gıgıenalyq talaptarǵa saı ekeni anyqtaldy», - dedi Sádýaqas Baıǵabylov.
Tekserý barysynda anyqtalǵan buzýshylyqtarǵa qatysty «Astana sý arnasyna» 230 AEK kóleminde aıyppul salynyp, olqylyqtardy joıý kerektigi týraly tapsyrma berildi.
