Astana Sý Arnasy jelide taraǵan xabarlandyrýǵa qatysty túsinik berdi
ASTANA. QazAqparat - Áleýmettik jeliler men messendjerlerde aýyz sýdyń dezınfektsııasyna qatysty oryssha xabarlandyrý tarap jatyr. Onda 9-11 sáýir kúnderi uńǵymada dezınfektsııa jasalatyny, sol sebepti eki kún boıy sý ishýge bolmaıtyny aıtylǵan, dep xabarlaıdy QazAqparat tilshisi.
"Qurmetti sý tutynýshylary! 2018 jyly 9-11 sáýir kúnderi uńǵymanyń ǵana emes, jalpy sý taratý júıesinde dezınfektsııa jasalady. 24 saǵat boıy barlyq júıede suıyq xlor bolady. Sol sebepti bir táýlik boıy sýdy tutynýǵa bolmaıdy. Bir táýlikten keıin sýdy taǵy aǵyzyp alý qajet. Osylaısha, 2018 jyly 11 sáýirde ǵana ony paıdalanýǵa bolady. Sondyqtan 9-yna deıin 48 saǵatqa jetetin sýdy toltyryp alyńyzdar. 9-11 sáýir kúnderi aýyz sýdy tutynǵan ómirge qaýipti", - delingen xabarlandyrýda. Alaıda naqty qaı qala ekeni kórsetilmegen.
"Astana Sý Arnasy" MKK atalǵan aqparatty joqqa shyǵardy.
"Keshe kúni boıy WhatsApp arqyly 9-11 kúni sýdyń bolmaıtyny týraly aqparat tarady. Osy oraıda eske sala keteıin, elordanyń sýy Astana sý qoımasynan keledi. Atalǵan qoıma tabıǵatty qorǵaý aımaǵynda ornalasqan. Qoımadaǵy sý aldymen sorǵylaý-súzgileý stantsııasyna barady. Sol jerde tolyǵymen texnıkalyq tazalýdan ótedi jáne zararsyzdandyrylady. Osy jumysty arnaıy zertxana baqylaıdy. Jaqyn arada sý júıelerine dezınfektsııa júrgizý josparda joq", - dedi kompanııanyń baspasóz xatshysy Nazgúl Tálipova.
