«Astana sý arnasy» xalyqqa 216 mıllıon teńge qaıtarýǵa mindetteldi
ASTANA. QazAqparat - Búginde monopolıster tarıfterge tapsyrys bergende onyń ishine óz nysandaryn jańǵyrtý men jóndeýge ketetin shyǵyndardy da kirgizedi. Al ol sharalar oryndalmasa, tarıf arqyly xalyqtan jınaǵan aqshany qaıtarýy tıis. Buny QR Ulttyq ekonomıka mınıstrliginiń Tabıǵı monopolııalardy retteý jáne básekelestikti qorǵaý komıteti baqylaıdy, dep xabarlaıdy QazAqparat tilshisi.
"Máselen, ótken jyldyń qorytyndysy boıynsha Astanada sýmen qamtý sýbektisi ("Astana Sý Arnasy" - avt.) tarıften túsken aqshany qaıtarýǵa mindetteldi. Onyń shamamen 216 mln teńge kóleminde negizsiz tabys tapqany anyqtaldy. Bul degenimiz, tarıfpen aqsha jınaldy, biraq tıisti sharalar atqarylǵan joq. Ondaı jaǵdaı Shyǵys Qazaqstan men Aqtóbe oblystarynda tirkeldi", - deıdi komıtet tóraǵasynyń orynbasary Asan Darbaev.
Onyń aıtýynsha, monopolıst jarty jyl saıyn ınternet arqyly ınvestıtsııalyq baǵdarlamalaryn oryndaý barysy jaıynda esep berýge mindetti.
Aıta keteıik, bıyl jylý berý salasyndaǵy monopolıster de artyq tólengen aqshany qaıtarýy tıis. Respýblıka boıynsha ol somanyń kólemi 900 mln teńgeden asady. Jylý maýsymy kezinde daladaǵy aýa temperatýrasy árqıly bolatyndyqtan, monopolıster jyl saıyn xalyqtan túsken aqshany qaıta esepten artyǵyn qaıtarýy tıis. Bul - zańnyń talaby. Buǵan deıin tabıǵı monopolııalardy retteý jáne básekelestikti qorǵaý komıteti kimge qansha aqshanyń qaıtarylatynyn jarııalaǵan bolatyn.
