Astana Sý arnasy turǵyn úıdiń birinde ne sebepti sý tapshy bolǵanyn túsindirdi
«Muhamedhanov kóshesi boıyndaǵy 4 «A» («BI City Tokyo D blogy» TK) turǵyn úıindegi sý tapshylyǵyna qatysty aıtatyn bolsaq, osy máseleni sheshý maqsatynda turǵyndar, ákimdik jáne «Astana Sý arnasy» kásiporny ókilderi, sondaı-aq qyzmet kórsetip otyrǵan «BI Service» JShS basshylyǵymen kezdesti. Osy jıynda «Astana Sý arnasy» mamandary sý tapshylyǵyna turǵyn úıdiń ózindegi ishki jelilerdiń durys tartylmaýy sebep bolǵanyn túsindirdi», - delingen atalǵan mekemedegi baspasóz qyzmetiniń málimetinde.
Osy oraıda «Astana Sý arnasy» kásipornynyń mamandary súzgilerdi tazalaǵannan keıin, páterlerge sý jiberilgen.
«Bul turǵyda servıstik kompanııaǵa turǵyn úıdiń jertólesindegi sý júretin jelilerdi túzetip, qaıta jasaý nusqaýy berildi», - dep naqtylady kásiporyn mamandary.
Aıta keteıik, sý máselesine qatysty narazylyq bildirgen turǵyndarǵa qatysty vıdeo áleýmettik jelide taraǵan edi.