«Astana Sý Arnasy» qum aralas aýyzsýǵa qatysty jaýap berdi
ASTANA. QazAqparat - «Astana Sý Arnasy» kompanııasynyń baspasóz hatshysy Nazgúl Tálipova «Saýran-20» kóppáterli úıdegi qum aralas sýǵa qatysty aryzdardyń ótken jyly qazan aıynan bastap túskenin jetkizdi, dep habarlaıdy QazAqparat tilshisi.
«Sol kezde bizdiń zerthanamyz synamalardy alyp, aýyz sýdyń quramynda qumnyń bar ekenin rastady. Odan keıin ol úıge qosymsha fıltrler qoıylǵan bolatyn. Endi, qaıtadan qum shyqty degen aryzdar túse bastady. Qazirgi kezde bizdiń mamandarymyz taǵy fıltr qoıý máselesin pysyqtap jatyr. Endi, taǵy sýdy sóndirip, qosymsha fıltrlerdi qoıý qajet. Odan keıin sýdyń sapasyn baqylaımyz», - dedi N.Tálipova QazAqparat tilshisine bergen suhbatynda.
Onyń aıtýynsha, qumnyń shyǵý sebebin mańaıdaǵy jelilerden izdeý kerek. Sebebi «Saýran 20»-nyń janyndaǵy barlyq jeliler jańadan tartylǵan bolatyn. Bir jerden aqaý shyqsa, qubyrǵa qum kiredi.
«Mysaly, sý magıstralmen keledi. Eger kvartaldyń ishindegi jeliler durys jalǵanbasa, eki qubyrdyń arasyndaǵy tıtteı bir tesikten qum kiredi. Negizi, úsh-tórt aı buryn Saýran kóshesinde qubyr jarylǵan. Sodan boldy ma, ony anyq aıta almaımyn. Sondyqtan úıdiń ózin, janyndaǵy jelilerdi jan-jaqty tekserý kerek. Sol kezde belgili bolady», - dep atap kórsetti N.Tálipova.
Aıta keteıik, QazAqparat agenttigine Saýran 20 mekenjaıy boıynsha ornalasqan kóppáterli úıdiń turǵyndary aryzdanyp, tórt aıdan beri qum aralas sýdy iship jatqandaryn jetkizdi.
«Ótken jyly kúz aıynda sýyq sýdy qosqanda qum shyǵa bastady. Onyń ózin birden baıqaǵan joqpyz. Oǵan deıin tamaq ázirleýge paıdalandyq. Bir kúni ydys-aıaq jýyp jatqanda aq keseniń túbindegi qumdy baıqadym. Birden dabyl qaǵyp, qyzmet kórsetýshi kompanııaǵa habar berdik. Alaıda bir kún ótti, eki kún ótti, bir apta, tórt aı boldy, qum tolastaıtyn emes. Kir jýǵysh mashınkalarymyz bitelip jatyr. Aýyz shaıýǵa, tis jýýǵa qorqamyz. Ýnıtazdyń sý jınaǵyshy qumǵa tolyp ketti. Sumdyq qoı! Astananyń qaq ortasynda otyryp, qum aralas sýdy iship otyrmyz», - deıdi Gúlmıra esimdi turǵyn.
