Astana stansasynyń JІІB qyzmetkerleri mal urlap, úı salýǵa aqsha jınaǵan barymtashyny ustady
ASTANA. 14 tamyz. QazAqparat - Astana stansasynyń JІІB polıtsııa qyzmetkerleri barymtashylyqpen aınalysyp, quqyqqorǵaý organdaryna bir jyldan astam ýaqyt boıy ustatpaı júrgen Almaty oblysynyń 35 jastaǵy týmasyn qolǵa túsirdi.
Bul týraly Kóliktegi ІІD baspasóz qyzmetinen habarlady.
Vedomstvonyń jazýynsha, barymtashy 11 aı boıy bir shaǵyn sharýashylyqtyń qojaıynyna jaldanyp, malyn baǵyp berip júrgen. Mal ıesiniń senimine ábden kirip alǵan soń, ol maldardy jergilikti bazarǵa birtindep aparyp sata bastaǵan. Sóıtip óziniń úıin salý úshin aqsha jınaǵan. Ol baqtashy bolyp jumys istegen kezinde 60 bas qoı, 40 qozy, 4 sıyr men 10 eshkini satyp jiberipti. Mal ıesine keltirilgen shyǵyn 3 625 000 teńgege jetken kórinedi.
