Astana sportshylary bıyl qandaı halyqaralyq jarystarǵa qatysady
ASTANA. KAZINFORM — Aldaǵy Azııa oıyndaryna Astanadan 77 sportshy qatysady. Sondaı-aq elordalyq sportshylar Para Azııa oıyndary men jasóspirimder Olımpıadasynda baq synaıdy. Olardyń bıylǵy halyqaralyq jarystardaǵy kórsetkishi qandaı? Bul týraly Astana qalasynyń Dene shynyqtyrý jáne sport basqarmasy basshysynyń orynbasary Azamat Aǵzamov aıtyp berdi.
Azııa oıyndarynda Astananyń ókildigi artty
19 qyrkúıek pen 4 qazan aralyǵynda Japonııada Aichi–Nagoya 2026 XX jazǵy Azııa oıyndary ótedi. Jarys baǵdarlamasyna 43 sport túri engizilip, 460 medal jıyntyǵy sarapqa salynady.
Qazaqstan ulttyq quramasynyń sapynda Astanadan 30 sport túri boıynsha 77 sportshy baq synaıdy.
Azamat Aǵzamovtyń aıtýynsha, aldyńǵy Azııa oıyndarymen salystyrǵanda elordalyq sportshylardyń sany da, olar qatysatyn sport túrleriniń qatary da artqan.
— 2023 jyly Qytaıdyń Hanchjoý qalasynda ótken Azııa oıyndaryna elordadan 18 sport túrinen 46 sportshy qatysqan. Bıyl sportshylar sany 31 adamǵa, ıaǵnı 67%-dan astamǵa artty. Sonymen qatar elordalyq sportshylar qatysatyn sport túrleriniń sany 18-den 30-ǵa deıin ósti, — dedi ol.
Astana ókilderi basketbol, 3×3 basketbol, gandbol, boks, kúres, taekvondo, djıý-djıtsý, kórkem jáne sporttyq gımnastıka, sý sporty, akademııalyq esý, baıdarka jáne kanoede esý, trıatlon, tennıs, ústel tennısi, at sporty, semserlesý, atý, jeńil atletıka, velosport, skeıtbordıng, sporttyq quzǵa órmeleý, breıkıng, kıbersport jáne padel sııaqty sport túrlerinen óner kórsetedi.
Hanchjoýdaǵy nátıje: 1 altyn, 3 kúmis, 6 qola
2023 jylǵy Azııa oıyndarynda Astana sportshylary 10 medal ıelengen. Onyń bireýi — altyn, úsheýi — kúmis, altaýy — qola.
Bıyl elordalyq sportshylardyń Azııa oıyndaryndaǵy qatary kóbeıip, olar baq synaıtyn sport túrleriniń sany da artty.
— Jarysqa qurlyqtyń úzdik sportshylary, sonyń ishinde Olımpıada oıyndary men álem chempıonattarynyń jeńimpazdary men júldegerleri qatysady, — dedi Azamat Aǵzamov.
Kóshpendiler oıyndarynda elordalyqtar jeti sport túrinen baq synady
Qyrkúıekte Qyrǵyz Respýblıkasynda VI Dúnıejúzilik kóshpendiler oıyndary ótti. Baıraqty dodaǵa 113 elden 3 myńǵa jýyq sportshy qatysty.
Qazaqstan quramasynyń sapynda 152 sportshy óner kórsetip, el jalpykomandalyq esepte birinshi oryn ıelendi. Astanadan jeti sport túri boıynsha 13 sportshy baq synady.
— Elordalyq sportshylar dástúrli sadaq atý, mangala, mas-restlıng, jilik syndyrý, goresh, jorgo salysh jáne taıǵan jarysy boıynsha synǵa tústi. Olar jekeleı jáne komandalyq jarystarda júldeli oryndarǵa ıe bolyp, Qazaqstan quramasynyń jeńisine úles qosty, — dedi basqarma basshysynyń orynbasary.
Para Azııa oıyndary men jasóspirimder Olımpıadasy
Azııa oıyndarynan keıin halyqaralyq sport kúntizbesi Para Azııa oıyndarymen jalǵasady. Qazaqstan ulttyq quramasynyń sapynda Astana sportshylary da óner kórsetedi.
Sonymen qatar IV jazǵy jasóspirimder Olımpıadasy 31 qazan men 14 qarasha aralyǵynda Senegaldyń Dakar qalasynda ótedi. Jarysqa 14–17 jas aralyǵyndaǵy 2 700-ge jýyq sportshy qatysady dep josparlanǵan. Básekeler 25 sport túrinen uıymdastyrylady.
Qazir irikteý kezeńi jalǵasyp jatyr. Astanalyq trıatlonshy Ramazan Aınegov jasóspirimder Olımpıadasyna qatysý lıtsenzııasyn ıelengen.
— Ramazan Aınegov jeke sprınt baǵdarlamasynda óner kórsetedi, — dedi Azamat Aǵzamov.
Onyń aıtýynsha, elordalyq sportshylardyń halyqaralyq jarystardaǵy qatarynyń artýy Astanada sporttyń túrli baǵyttaryn damytý jáne joǵary jetistikter sportyna rezerv daıarlaý jumystarynyń nátıjesin kórsetedi.
Buǵan deıin Azııa oıyndarynda el namysyn 559 sportshy qorǵaıtynyn jazǵan edik.
