Astana sotynyń aralasýymen májbúrli túrde jerinen aıyrylǵan astanalyqqa tólenetin ótemaqy mólsheri 4 eseden astam ulǵaıtyldy
ASTANA. QazAqparat - Astana qalalyq sotynyń kassatsııalyq sot alqasynyń qaýlysymen baspanasynan aıyrylǵan D. Jaqypovanyń quqy men zańdy talaptary oryndaldy.
Bul týraly búgin Astana qalalyq sotynda ótken «Jer telimderin memleket qajetine qaıtarý kezinde ótemaqy mólsherin belgileý máseleleri» atty dóńgelek ústel otyrysynda Astana qalalyq sotynyń sýdıasy Qarlyǵash Tatkeeva aıtty.
Esterińizge sala keteıik, D. Jaqypova balalarymen turyp jatqan Astana qalasy, Saryarqa aýdany, «SÝ Spetsstroı» baǵbandyq seriktestigi, Vıshnevaıa kóshesi, 71 meken-jaıyndaǵy jer telimi úı-jaıymen syrylyp tastalyp, jeri májbúrli túrde memleket qajettiligine qaıtarylǵan bolatyn. Oǵan ákimdik tarapynan 1 458 000 teńge ótemaqy berilgen.
«Ákimdik Jaqypovanyń jer telimi men ondaǵy qurylystyń, jasyl jelektiń qunyna saı emes ótemaqy tólegen. Sonymen qatar, ákimdik atalǵan baǵbandyq úı arasynda jas balalary bar 5 adamnan turatyn otbasynyń turyp jatqan jalǵyz baspanasy ekenin esepke almaǵan jáne olardyń bergen aqshasy tipti bir bólmeli páter satyp alýǵa da jetpeıdi. Degenmen, otbasy bir bólmeli páterge de kelisip otyrǵan. Alaıda ákimdik bul jaǵdaıdy da qarastyrmaǵan», - dep atap ótti Q. Tatkeeva.
Onyń aıtýynsha, Astana qalalyq sotynyń kassatsııalyq sot alqasynyń qaýlysymen baspanasynan aıyrylǵan D. Jaqypovanyń quqy men zańdy talaptary oryndaldy. Oǵan sot jer telimin májbúrli túrde ótemaqymen memleket qajetine qaıtarý isi boıynsha jerdegi quyrylystar men jasyl jelekti esepteı otyryp, 7 108 022 teńge kóleminde ótemaqy tóleýdi bekitti.
