Astana sotynda jigitin «piship» tastamaq bolǵan kelinshektiń isi qaralýda
ASTANA. QazAqparat - Astanada er adamnyń tánine zaqym keltirý isi boıynsha sotqa deıingi tergeý amaldary júrip jatyr, dep habarlaıdy QazAqparat tilshisi.
«QR Qylmystyq Kodeksiniń 201-baby, 1-bóligine sáıkes, sotqa deıingi tergeý derekterin jarııalaı almaımyz. Osyǵan baılanysty, sot atalǵan iske qatysty pikir bildire almaıdy. Barlyq suraqtar boıynsha tergeý organdaryna habarlasý qajet», - deıdi agenttik saýalyna jaýap bergen qalalyq sottyń baspasóz qyzmeti.
Aıta keteıik, buǵan deıin áleýmettik jelide 36 jastaǵy kelinshek óz súıiktisin jynystyq múshesinen aıyrǵysy kelgeni týraly aqparat tarap ketken bolatyn.
Jeliler men messendjerlerde Astana qalasy Esil aýdandyq №2 sotynyń 2018 jylǵy 24 qańtardaǵy qaýlysy retinde sıpattalǵan foto paıda boldy. Ondaǵy derekterge súıensek, súıiktisinen ózge qyzben kóńil qosty dep kúdiktengen 1981 jyly týǵan áıel, ony ıntımdik oıyn oınaýǵa shaqyryp, keıinnen aıaq-qolyn baılaǵan. Sosyn dári bergen. Aldyn ala boljam boıynsha, uıyqtatatyn preparat.
Sodan soń bar ókpe-renishin aıtyp, er adamnyń jynystyq múshesine tilikter jasaı bastaǵan. «Jazalaý» barysynda súıiktisiniń azabyn jeńildetý úshin áıel onyń shabyna 3 ret Ledokoın ekken. Keıin qansyraǵan er adamdy óz kóligimen aýrýhanaǵa alyp barǵan.
Astana qalalyq soty ázirshe atalǵan iske qatysty pikir bildire almady.
