Astana soty jelide jala jabý jaıly: Ár azamattyń óz oıyn aıtýǵa qaqysy bar

ASTANA. QazAqparat - Astana qalasynyń Esil aýdandyq №2 soty ótken jyldyń qorytyndysyn shyǵardy. Sonyń ishinde áleýmettik jelide jala jabý isteri de bar, dep habarlaıdy QazAqparat tilshisi.

Sýdıa Qanat Tobaǵalıulynyń aıtýynsha, ondaı ister jeke tártippen túsedi. Al isti qaraý kezinde áleýmettik jelide óz pikirin jazǵan adamnyń sózi jan-jaqty zerdelenedi. Onyń astarynda bireýge til tıgizý, ıa bolmasa, qorlaý sıpaty bolmasa, ony adamnyń jeke pikiri dep sanaý qajet. Ol úshin qylmystyq jaza qoldanylmaıdy.

«Máselen, Astanadaǵy bir tanymal fırmanyń logotıpin qoldanýǵa qatysty oqıǵa boldy. Ony áleýmettik jelide keńinen talqylaǵan bolatyn. Sonda bir adam Feısbýkte óz pikirin jazdy. Jańaǵy fırma bolsa, ony jala japty dep, bizge aryz túsirdi. Sot óziniń jeke pikirin jazǵan adamdy aqtady. Sebebi, onyń áreketinde qylmystyq sıpat bolǵan joq. Ol ádeıi bireýge til tıgizemen, jala jabamyn dep, pikir jazǵan joq. Jeke pikirin ǵana jazdy. Demek, eshqandaı qylmys jasamady. Sosyn Qazaqstannyń kez kelgen azamaty óziniń jeke pikirin ashyq aıta alady. Bireýdi qorlaý, til tıgizý sıpaty bolmasa, ol adamnyń jeke oı-pikiri bolyp sanalady. Ol úshin jala japty dep sottaı almaımyz», - dedi Q.Tobaǵalıuly Astanada ótken baspasóz máslıhatynda.

Aıta keteıik, brıfıng kezinde sýdıa Eskendir Súleımenovtyń qazasy úshin kináli dep tanylǵan Malıka Muhıtovany qamaýǵa alý sharasy týraly aıtyp berdi. Sondaı-aq, óz jigitine kastratsııa jasaǵan kelinshektiń taǵdyry jaıynda baıandady.