Astana soty jańa vagon satyp almaǵan temirjol kompanııasyn sýbsıdııadan aıyrdy

ASTANA. KAZINFORM — Astana qalasynyń soty jolaýshylardy temirjolmen tasymaldaýǵa arnalǵan uzaqmerzimdi sýbsıdııalaý sharty boıynsha memlekettik organ men jeke kompanııa arasyndaǵy daýdy qarady.

Іs tasymaldaýshynyń shartta kózdelgen vagon parkin jańartý mindettemesin oryndamaýyna baılanysty qozǵalǵan.

- Shartqa sáıkes, kompanııa jańa vagondar satyp alyp, múgedektigi bar jandarǵa beıimdelgen quramdardy engizýge tıis bolǵan. Alaıda sýbsıdııa alǵanyna qaramastan, tasymaldaýshy tek buryn paıdalanylǵan, jóndelgen vagondardy usynǵan, - dep jazdy sottan.

Birinshi satydaǵy sot bul áreketti sharttaǵy «jańartý» uǵymyna jatqyzýǵa bolatynyn aıtyp, tasymaldaýshyny qoldady. Alaıda apellıatsııalyq sot bul sheshimdi joıyp, shart maqsattary eskerilmegenin alǵa tartty. Jolaýshylar tarapynan vagondar jaı-kúıine qatysty kóptegen shaǵymdar tirkelgen.

Nátıjesinde sot shartty memlekettik organ paıdasyna buzyp, bıýdjettik qarajattyń maqsatsyz jumsalǵanyn zań buzýshylyq dep tanydy. Bul sheshim qyzmet sapasyn arttyrý jáne sharttyq mindettemelerdiń naqty oryndalýyn qamtamasyz etýge baǵyttalǵan.

Buǵan deıin Almaty-Qostanaı baǵytyndaǵy aqaýy bar vagon «Jolaýshylar tasymalyna» tıesili bolyp shyqqanyn jazǵanbyz.