Astana soty zergerlik buıymdar urlaǵan áıeldiń jazasyn jeńildetti

ASTANA. KAZINFORM – Astana qalalyq sotynyń qylmystyq ister jónindegi sot alqasy zergerlik buıymdardy birneshe ret urlaǵany úshin sottalǵan Ch. esimdi áıelge qatysty apellıatsııalyq shaǵymdy qarady.

Birinshi satydaǵy sottyń anyqtaýynsha, 2025 jylǵy 18-30 qańtar aralyǵynda Ch. adal satyp alýshy keıpinde áreket etip, altynnan jasalǵan zergerlik buıymdardy jasyryn túrde urlap, keıin olardy lombardqa ótkizip otyrǵan.

Onyń áreketteriniń saldarynan jábirlenýshilerge 447 myń teńge kóleminde materıaldyq zalal keltirilgen.

Sottalýshynyń kinási ózi moıyndaǵan aıǵaqtarymen, jábirlenýshilerdiń kórsetýlerimen, aqsha aýdarymdarynyń túbirtekterimen jáne lombardpen jasalǵan komıssııalyq sharttarmen dáleldengen.

- Kinásin moıyndaýy, shyn ókinýi jáne aýyrlatatyn mán-jaılardyń bolmaýy eskerilip, birinshi satydaǵy sot Ch.-ǵa 3 jyl merzimge bas bostandyǵyn shekteý túrindegi jaza taǵaıyndaǵan.

Apellıatsııalyq satyda sot alqasy úkimdi ózgertip, QK-niń 60-babynyń 4-bóligin (úkimderdiń jıyntyǵy boıynsha jaza taǵaıyndaý) qoldanýdy alyp tastady jáne 2025 jylǵy 23 maýsymdaǵy «Qazaqstan Respýblıkasy Konstıtýtsııasynyń 30 jyldyǵyna baılanysty raqymshylyq týraly» Zań normalaryn qoldandy, - dep jazdy Astana sottary Telegram-arnasy.

Raqymshylyqqa sáıkes, taǵaıyndalǵan jazanyń ótelmegen bóligi 1/5 mólsherine qysqartyldy.

Osylaısha, Ch. esimdi sottalýshyǵa 2 jyl 9 aı 18 kún bas bostandyǵyn shekteý túrindegi túpkilikti jaza belgilendi.

Úkim zańdy kúshine endi.

Aıta keteıik, mas kúıinde apatqa ushyraǵan astanalyq 4 jylǵa sottalyp ketti.