Astana soty Qashaǵan operatoryna berilgen Ekologııa mınıstrliginiń nusqamasyn joıdy

ASTANA. KAZINFORM – Elordanyń ákimshilik ister jónindegi sot alqasy «Nort Kaspıan Opereıtıng Kompanı N.V.» kompanııasynyń Atyraý oblysy ekologııa departamentine qarsy nusqamany zańsyz dep taný jáne ony joıý týraly ákimshilik isin qarady.

Іsti qaraý barysynda ýákiletti organ nusqama shyǵarǵan kezde QR Ákimshilik rásimdik-protsestik kodeksinde kózdelgen rásimdik zań buzýshylyqtarǵa jol bergeni anyqtaldy. Bul atalǵan nusqamany joıýǵa negiz boldy. 

Alaıda, bul rásimdik zań buzýshylyqtar joıylýy múmkin bolǵandyqtan, sot Atyraý oblysy ekologııa departamentine ákimshilik rásimdi ýákiletti organnyń quqyqtyq ustanymyn eskere otyryp aıaqtaý mindetin júktedi, biraq ekologııalyq zań buzýshylyqtardyń máni talqylanǵan joq.

Sonymen qatar, nusqamanyń rásimdik talapty saqtamaýyna baılanysty joıylýy ekologııalyq zańnama normalarynyń buzylmaǵanyn avtomatty túrde bildirmeıdi.

Sot bul isti qaraý barysynda Ekologııa departamentiniń anyqtaǵan zań buzýshylyqtar boıynsha tujyrymnyń negizdiligine nemese negizsizdigine baǵa bergen joq.

Osylaısha, sot sheshimi ekologııa departamenti anyqtaǵan zań buzýshylyqtardyń mánine áser etpeıdi jáne ýákiletti organ rásimdik kemshilikti joıǵan jaǵdaıda qaıta áreket etý múmkindigin joqqa shyǵarmaıdy.

Biz osy oraıda Ekologııa jáne tabıǵı resýrstar mınıstrliginen túsinikteme suradyq. Vedomstvo atalǵan jaǵdaıǵa qatysty sot sheshiminiń resmı kóshirmesin alǵannan keıin túsinikteme beriletinin habarlady.

Eske salaıyq, byltyr Qazaqstan Qashaǵan operatorynan talap etip otyrǵan somany 160 mlrd dollarǵa ulǵaıtty.

Aıta ketsek, Qashaǵan gazyn óńdeıtin zaýyt 2026 jyly iske qosylady.