Astana Smart City: Astanada 60 myńnan astam kamera qala tazalyǵyn baqylaıdy
ASTANA. KAZINFORM – Astana Smart City ahýaldyq ortalyǵynyń basqarýshy dırektory Aıbek Ahmetbekov qaladaǵy tazalyq pen qoǵamdyq qaýipsizdikti qamtamasyz etýde tsıfrlyq tehnologııalar keńinen qoldanylyp jatqanyn aıtty.
Onyń aıtýynsha, búginde qalada abattandyrý, tazalyq jáne ekologııa salasyndaǵy joǵary standarttardy saqtaý úshin Astana Smart City jobasynyń tsıfrlyq quraldary belsendi paıdalanylyp keledi. Jobanyń basty maqsaty – qalanyń negizgi júıelerin biryńǵaı zııatkerlik platformaǵa biriktirip, qaladaǵy jaǵdaıdy naqty ýaqyt rejıminde baqylaýǵa jáne túrli oqıǵalarǵa jedel áreket etýge múmkindik berý.
– Búginde biryńǵaı tsıfrlyq júıege jasandy ıntellekt elementterimen jabdyqtalǵan 60 myńnan astam beınekamera qosylǵan. Olar saıabaqtarda, aýlalarda, mektepterde, qoǵamdyq kólikterde jáne qalalyq ınfraqurylym nysandarynda ornatylǵan. Sonymen qatar qalany jan-jaqty baqylaýǵa múmkindik beretin, beıneni birneshe ese úlkeıtetin alys qashyqtyqqa arnalǵan kameralar bar. Olar qalanyń aınalasyndaǵy bıik ǵımarattarǵa ornalastyrylǵan. Budan bólek, platformaǵa termokameralar da biriktirilgen. Bul tútinniń paıda bolýyn jáne aýqymdy tótenshe jaǵdaılardy der kezinde anyqtaýǵa múmkindik beredi, – dedi ol Astana qalasynyń kommýnıkatsııalar qyzmeti alańynda ótken brıfıngte.
Spıkerdiń sózinshe, beınebaqylaý júıesine kezeń-kezeńimen jasandy ıntellekt negizindegi beıneanalıtıka engizilip jatyr. Qazirgi ýaqytta 35-ten astam stsenarıı boıynsha taldaý júrgiziledi.
– Búgingi brıfıng taqyrybyna qatysty aıtsaq, júıe qoǵamdyq oryndardyń lastanýyn, ruqsat etilmegen qoqys úıindilerin, vandalızm faktilerin jáne aıaldama pavılondarynyń, shaǵyn sáýlet nysandarynyń, jaryqtandyrý elementteriniń jáne abattandyrý nysandarynyń búlinýin anyqtaı alady. Sondaı-aq qoǵamdyq oryndardaǵy zańsyz saýda, qoǵamdyq tártiptiń buzylýy, qaraýsyz qalǵan zattar, tútin belgileri jáne basqa da qaýipter tirkeledi, – dedi Aıbek Ahmetbekov.
Ol jasandy ıntellekt adamnyń jumysyn almastyrmaıtynyn, tek operatordyń jumysyn jeńildetetin qosymsha qural ekenin atap ótti.
– Jasandy ıntellekt operatordyń nazaryn yqtımal quqyq buzýshylyqtarǵa aýdarady. Al túpkilikti sheshimdi operatordyń ózi qabyldaıdy. ıAǵnı oqıǵanyń shynymen bolǵanyn, jalǵan dabyl nemese qaıtalanǵan habarlama ekenin adam anyqtaıdy, – dedi ol.
Aıbek Saǵıdollaulynyń aıtýynsha, jobanyń negizgi quramdas bólikteriniń biri – Astana qalasynyń ahýaldyq ortalyǵy.
– Bul qalanyń barlyq beınekameralarynan, datchıkterinen, IoT qurylǵylarynan jáne kólik qyzmetteriniń GPS júıelerinen aqparat naqty ýaqyt rejıminde túsetin biryńǵaı úılestirý ortalyǵy. Árbir oqıǵa biryńǵaı algorıtm boıynsha qaralady. Aldymen oqıǵa avtomatty túrde nemese operator arqyly tirkeledi, keıin tekserilip, jaýapty memlekettik organǵa nemese qyzmetke joldanady. Odan keıin onyń oryndalýy júıe arqyly baqylanady. Osylaısha barlyq qatysýshy birdeı aqparatty kórip otyrady, bul ótinishterdiń joǵalyp ketýine nemese olardyń oryndalý merziminiń sozylyp ketýine jol bermeıdi, – dep qorytyndylady spıker.
Aıta keteıik, bıyl Astanada 122 zańsyz qoqys orny anyqtaldy.
