«Astana» slovenııalyq «Marıbordy» utyp, Chempıondar Lıgasynyń kelesi kezeńine shyqty (FOTO)
ASTANA. QazAqparat - Elordadaǵy «Astana-Arena» stadıonynda ÝEFA Chempıondar Lıgasynyń ekinshi irikteý kezeńinde «Astana» fýtbol komandasy slovenııalyq «Marıbordy» qabyldap, 3:1 esebimen utty. Osylaısha, fýtboldan Qazaqstan chempıony «Astana» komandasy eki matchtaǵy kezdesý qorytyndysy boıynsha Chempıondar Lıgasynyń kelesi kezeńine shyqty.
Kezdesý barysynda esepti alǵash bolyp oıynnyń 11-mınýtynda «Astanalyq» Baýyrjan Jolshıev ashqan bolatyn. Odan keıin 39-mınýtta qonaqtar esepti teńestirdi. Birinshi taım aıaqtalar tusta «Astana» qaıta alǵa shyqty, bul joly 43-shi mınýtta Roher Kanıas dál soqqy jasap, komandany alǵa shyǵardy. Alǵashqy taım 2:1 esebimen aıaqtaldy. Al oıynnyń ekinshi bóliginde 58-shi mınýtta «Astanalyq» Patrık Tvýması qonaqtar qaqpasyna úshinshi goldy soǵyp, óz komandasyna jeńis syılady.
Eske sala keteıik, buǵan deıingi kezdesýde «Astana» Slovenııada «Marıborǵa» 0:1 esebimen ese jiberip alǵan bolatyn. Endi eki oıynnyń qorytyndysy boıynsha (jalpy esep - 3:2) bizdiń komanda irikteýdiń kelesi kezeńine shyǵyp otyr.
