Astana-Şýchınsk trassasyndaǵy aqy alý pýnktinde «Gazel» órtendi
ASTANA. KAZINFORM — 14 tamyz kúni saǵat 16:43–te Astana-Şýchınsk avtojolyndaǵy «Şýchınsk» aqy alý pýnktine kireberiste qozǵalys jolaǵynda «Gazel» avtokóligi órtke orandy, dep habarlaıdy «QazAvtoJol» UK baspasóz qyzmeti.
— Oqıǵaǵa baılanysty atalǵan jolaqtaǵy qozǵalys ýaqytsha toqtatyldy. TJM qyzmetkerleri oqıǵa ornyna kelip, órtti tolyq sóndirdi. Zardap shekkender joq. Qazirgi ýaqytta jol qozǵalysy qalpyna keltirildi. Órttiń shyǵý sebebi anyqtalyp jatyr, — delingen kompanııa taratqan aqparatta.
«QazAvtoJol» baspasóz qyzmeti atap ótkendeı, bul jaǵdaı kólik quraldarynyń tehnıkalyq jaı-kúıin únemi baqylaýda ustaýdyń qanshalyqty mańyzdy ekenin taǵy bir márte eske salady.
— Tehnıkalyq baıqaýdan belgilengen merzimde ótip, avtokólikke ýaqtyly tehnıkalyq qyzmet kórsetińiz. Ásirese elektr symdarynyń, janarmaı júıesiniń, qozǵaltqyshtyń, akkýmýlıatordyń jáne basqa da mańyzdy toraptardyń jaǵdaıyna nazar aýdarǵan jón. Olardyń aqaýy jol ústinde qaýipti jaǵdaıǵa ákelýi múmkin. Alys saparǵa shyǵar aldynda kóliktiń tehnıkalyq jaramdylyǵyn tekserip, órt sóndirgishtiń bar ári jaramdy ekenine kóz jetkizińiz. Tehnıkalyq turǵydan jaramdy kólik — júrgizýshi men jolaýshylardyń ǵana emes, jol qozǵalysyna qatysýshylardyń barlyǵynyń qaýipsizdigi, — dep keńes berdi vedomstvo mamandary.
Buǵan deıin Ertis-Baıan óńirinde orman órtteri 25 %-ǵa kóbeıgenin jazdyq.
