Astana – Şýchınsk tasjolynda júrgizýshi uıyqtap ketip, jol apatyna tústi
ASTANA. KAZINFORM — 15 tamyz saǵat 08:43-te Astana – Şýchınsk avtojolyndaǵy «Astana» aqy alý pýnktine kireberiste Toyota Land Cruiser Prado avtokóliginiń qatysýymen jol-kólik oqıǵasy boldy.
Aldyn ala málimet boıynsha, júrgizýshi rólde uıyqtap ketken. Saldarynan kólik basqarýdan shyǵyp, úshinshi jáne tórtinshi qozǵalys jolaqtarynyń arasyndaǵy jol ınfraqurylymy nysandaryna soǵylǵan.
Abyroı bolǵanda, oqıǵa saldarynan zardap shekkender joq. Júrgizýshi kólikte jalǵyz bolǵan jáne medıtsınalyq kómekten bas tartqan.
Jol-kólik oqıǵasyna baılanysty úshinshi jáne tórtinshi jolaqtardaǵy qozǵalys ýaqytsha toqtatyldy. Oqıǵa saldary tolyq joıylǵannan keıin saǵat 11:34-te qozǵalys qaıta qalpyna keltirildi.
Aldyn ala málimet boıynsha, soqtyǵysý saldarynan jol belgisi, jolaqtardy bóletin qorǵanysh býferi jáne beton blok zaqymdanǵan.
Aıta ketelik Astana-Şýchınsk trassasyndaǵy aqy alý pýnktinde «Gazel» órtengen edi.
