«Astana-Şýchınsk» alǵashqy aqyly jol ýchaskesi arqyly 90 mln sapar tirkeldi

ASTANA. KAZINFORM – «Astana-Şýchınsk» avtojolyna aqparattyq-baǵdarlamalyq keshen ornatylǵaly beri 90 mln astam sapar jasaldy, bul shamamen 13 mln avtokólikti quraıdy. Bul týraly «QazAvtoJol» AQ baspasóz qyzmeti málimdedi.

2013 jyly engizilgen birinshi aqyly ýchaske «Astana-Şýchınsk» joly elimizdiń jol ınfraqurylymynyń mańyzdy bóligine aınaldy.

2018 jyldan bastap 11 aqyly ýchaskede otandyq aqparattyq-baǵdarlamalyq keshender ornatyla bastaldy.

«Aqparattyq-baǵdarlamalyq keshender (ABK) baqylaý arkalarynda ornatylǵan jáne olar avtomatty túrde kólik quralynyń qozǵalysyn tirkep, derekterdi óńdeýge, saqtaýǵa jáne joldaýǵa arnalǵan. «Astana-Şýchınsk» aqyly ýchaskesin tańdaǵan jol paıdalanýshylarǵa alǵysymyzdy bildirip, joldardy qolaıly ári qaýipsiz bolý maqsatynda jumystarymyzdy jalǵastyramyz», — dep habarlady kompanııanyń baspasóz qyzmeti.