«Astana-Şýche» tas jolyndaǵy apat: Zaqym kelgen kólikter sany 95-ke jetti

ASTANA. KAZINFORM — «Astana-Şýche» tas jolyndaǵy jappaı kólik apatynda 95-ke jýyq avtokólik zardap shekti. Bul týraly «QazAvtoJol» UK» AQ jedel aqparatynda aıtyldy. 2025 jyldyń 3 qańtarynda saǵat 07:20–da respýblıkalyq mańyzy bar «Astana-Petropavl» avtojolynyń ýchaskesinde (18–232 shaqyrymdary) aýa raıynyń nasharlaýyna baılanysty barlyq avtokólik qozǵalysyna shekteý engizildi.

— Aýa raıy jaqsaryp, jol tazalanǵannan keıin saǵat 12:30–da polıtsııa departamenti qyzmetkerleri men «QazAvtoJol» arnaıy tehnıkasynyń súıemeldeýimen Şýchınsk baǵytyna qozǵalys uıymdastyryldy. Alaıda, aldyn ala málimetter boıynsha, júrgizýshilerdiń jyldamdyq rejımin jáne qaýipsiz qashyqtyqty saqtamaýy saldarynan saǵat 13:28–de trassanyń 153-shaqyrymynda, Janatalap aýylynyń mańynda shamamen 95 kóliktiń qatysýymen jappaı jol apaty oryn aldy, — dep jazdy Qazavtojol. 

Oqıǵa ornynda polıtsııa qyzmetkerleri men «QazAvtoJol» mamandary jumys isteýde. Bir jolaq tazartylyp, jaramdy avtokólikter qozǵalysyn bastady.

Oqıǵa ornynda 22 kópfýnktsıonaldy jol mashınasy jáne 2 traktor jumyldyrylǵan.
Qazirgi ýaqytta osy jol ýchaskesinde barlyq kólik túrleri úshin qozǵalys qaıtadan shekteldi.
Ázirge qaza bolǵandar men zardap shekkender týraly aqparat túsken joq.

Eske sala keteıik, buǵan deıin Astana-Şýche tas jolynda 40-qa jýyq avtokólik soqtyǵysqanyn jazǵan bolatynbyz.