Astana-Şýche tas jolynda 40-qa jýyq avtokólik soqtyǵysty
ASTANA. KAZINFORM – Aqmola oblysynda «Astana-Şýchınsk» tas jolynda jappaı jol apaty boldy, onda shamamen 40 avtokólik soqtyǵysqan, dep habarlaıdy Kazinform agenttiginiń tilshisi.
Aqmola oblysy polıtsııa departamentiniń baspasóz qyzmeti habarlaǵandaı, jol apaty 3 qańtar kúni saǵat 13:30-da Birjan sal aýdanynyń Qoǵam jáne Qaratal aýyldarynyń arasynda bolǵan.
– Aýa raıynyń nasharlaýyna baılanysty (boran, kórinýdiń shektelýi) aldyn ala málimet boıynsha shamamen 40 kólik soqtyǵysqan. Ázirge qaza bolǵandar men zardap shekkender týraly aqparat túsken joq. Oqıǵa ornynda polıtsııa jáne tótenshe jaǵdaılar qyzmetiniń mamandary jumys istep jatyr. Kólikterdi evakýatsııalaý jáne jol qozǵalysy qaýipsizdigin qamtamasyz etý sharalary júrgizilýde, – dep habarlady vedomstvo.
Buǵan deıin tótenshe qyzmetter óńirde aýa raıynyń nasharlaýyna baılanysty barlyq júrgizýshilerge, ásirese qala syrtyndaǵy joldarda, saparlardan bas tartýdy usynǵan bolatyn.
– Júrgizýshilerdi aýa raıy jaǵdaılaryn eskerýge, jolda óte saq bolýǵa jáne jaǵdaı jaqsarǵansha osy baǵytta júrýden bas tartýǵa shaqyramyz, – dep málimdedi polıtsııa.
Aıta keteıik, aýa raıynyń buzylýyna baılanysty birneshe respýblıkalyq avtojoldarda kólik qozǵalysyna shekteý qoıyldy.