Astana-Shortandy avtojolyn kútip ustaý shyǵyny jylyna 1 mlrd. 300 mln. teńgeni quraıdy

Bul týraly búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine avtojol salasyn reformalaý máseleleri boıynsha ózgerister men tolyqtyrýlar engizý týraly» zań jobasyn talqylaý barysynda málim boldy.

Kólik jáne kommýnıkatsııa vıtse-mınıstri Roman Sklıar avtojoldardy ustap turýǵa bólinetin qarajatqa toqtala kele, Qazaqstan boıynsha 23 myń shaqyrymdy quraıtyn respýblıkalyq jelilerdi kútip ustaýǵa toǵyz mıllıard teńge bólinetinin atap ótti.

«Al normatıvtik qajettilik mólsheri boıynsha bul joldarǵa 38 mlrd. teńge bólinýi tıis bolatyn. Sonymen qatar «a» sanatyndaǵy alty jolaqty Astana-Shortandy avtojoly ýchaskesiniń jyl saıynǵy aǵymdaǵy ustap turý shyǵyny 1 mlrd. 300 mln. teńgeni quraıdy. Biz aqyly joldy engizgende tek sol joldyń aǵymdaǵy ustap turý shyǵynyn jabýdy ǵana kózdeımiz. Sondyqtan da, bizdiń belgilegen tarıf basqa eldermen salystyrǵanda aıtarlyqtaı arzan bolyp otyr», - deıdi vıtse-mınıstr.