Astana sheteldik týrısterdi nesimen tańǵaldyrady
ASTANA.KAZINFORM – Qazir Astanaǵa qalany arnaıy aralap, kórikti jerlermen tanysý úshin keletin sheteldik týrısterdiń sany artyp keledi. Bundaı pikirdi Skyway týroperatorynyń jetekshisi Ásem Qozbaǵarova AIMAQ podkastynyń jańa shyǵarylymynda aıtty.
Sarapshynyń aıtýynsha, kóp jyl boıy qalaǵa keletin týrısterdiń basym bóligin iskerlik kezdesýler men túrli is-sharalarǵa qatysýshylar quraǵan. Alaıda qazir saıahatshylardyń qyzyǵýshylyǵy ózgerip, Astanany arnaıy aralap kórýge nıetti qonaqtar kóbeıip keledi.
– Qazirdiń ózinde týrısterdiń qyzyǵýshylyǵy ózgerip jatqanyn baıqap otyrmyz. Qalany óz kózimen kórgisi keletin saıahatshylar kóbeıip keledi. Sebebi Astana óziniń erekshe sáýletimen shynymen de tańǵaldyrady, – dedi Ásem Qozbaǵarova.
Budan bólek, tanymal óner ıeleriniń kontsertteri men túrli sporttyq jarystar da týrısterdiń qyzyǵýshylyǵyn arttyryp otyr. Týroperator jetekshisiniń aıtýynsha, mundaı is-sharalarǵa Qazaqstan azamattarymen qatar, shetelden de qonaqtar arnaıy keledi.
Jazǵy jáne qysqy Astana – eki túrli týrıstik baǵyt
Qysqy týrızm de Astana úshin jańa múmkindikterdiń birine aınalyp keledi. Qys mezgilinde týrıster sany azaıǵanymen, sarapshy muny qysy qarsyz ótetin elderdiń turǵyndaryna elordany tanystyrýǵa jaqsy múmkindik dep sanaıdy.
– Jazǵy jáne qysqy Astana – eki túrli týrıstik baǵyt. Sondyqtan biz elordany jazda da, qysta da ózindik ereksheligi bar eki bólek baǵyt retinde tanystyryp, nasıhattaı alamyz, ıaǵnı, týrıster Astanaǵa jylyna eki ret kelip, ár mezgilde qalanyń ózgeshe kelbetin tamashalaı alady, – deıdi Ásem Qozbaǵarova.
Jaz mezgilinde týrısterge qalanyń sáýletimen, ashyq qoǵamdyq keńistikterimen tanysý, festıvalder men sporttyq is-sharalarǵa qatysý usynylady. Al qysta qar basqan qalanyń kórinisi, túrli oıyn-saýyq túrleri men mádenı baǵdarlamalarǵa basymdyq beriledi.
Ásem Qozbaǵarovanyń aıtýynsha, jaz mezgilinde atpen serýendeý jáne atpen uıymdastyrylatyn ekskýrsııalarǵa da suranys artyp keledi. Óıtkeni sheteldik saıahatshylardyń kópshiligi Qazaqstandy jylqy mádenıetimen baılanystyrady. Sondyqtan bul baǵyt eldiń týrıstik tartymdylyǵyn arttyratyn qosymsha artyqshylyq bola alady.
Aıta keteıik, ishki týrızm 84,4% ósti.
