Astana - Shardja avıareısi taǵy da keıinge qaldyryldy
ASTANA. QazAqparat - Shardjaǵa (BAÁ) ushýdy josparlaǵan jolaýshylar elorda áýejaıynda qonaq úılerge qaıtý úshin qol júkterin kútip otyr. Astana - Shardja reısi taǵy da keıinge qaldyryldy, dep habarlaıdy QazAqparat.
Air Arabia áýe kompanııasynyń ókili Gúlmıra Ahmetovanyń túsindirýinshe, eki márte keıinge qaldyrylǵan Astana - Shardja reısiniń attanýy 7 qańtarda saǵat 17:00-ge josparlanǵan.
Onyń aıtýynsha, qazirgi ýaqytta ekıpaj ben tehnıka áýe kemesiniń daıyndyǵyn testilik rejimde tekserýde.
«Jolaýshylar qonaq úılerge ornalastyrylady. Nıeti barlar bıletterin 8 qańtarǵa aýystyryp alýlaryna bolady», - dedi G.Ahmetova.
Eske sala ketsek, Astana - Shardja reısi 6 qańtarda eki márte ushyp kete almady. Birinshi joly ushaqtyń esigi qatyp qalyp ashylmady, keıinnen qozǵaltqyshtaǵy aqaý ushýdy toqtatýǵa sebepshi boldy. Qazirgi ýaqytta jolaýshylardyń kidirýi bir táýlikten asyp ketti.
