«Astana» shańyraq beınelengen formada óner kórsetýdi uzaq kútti
ASTANA. QazAqparat - Osy maýsymda, naqtyraq aıtsaq búgingi oıynnan bastap, «Astana» fýtbol komandasy ADIDAS kompanııasy usynǵan jańa oıyn formasymen alańǵa shyǵady. Bul jaıynda Qazaqstan fýtbol federatsııasynyń baspasóz qyzmetinen málim etti, dep habarlaıdy QazAqparat.
ADIDAS kompanııasy «Astana» fýtbol klýby úshin arnaıy Miteam jelisi boıynsha - kók jáne kógildir tústi grafıkalyq sýret beınelengen aq, surǵylt-kók jáne qanyq-sary úsh tústi formany daıyndady. Sońǵy eki oıyn jeıdesiniń tómengi bóliginde shańyraq beınesi beınelengen. Shańyraq - qazaq mádenıetiniń dástúrli elementi, úı, oshaq jáne urpaq jalǵastyǵynyń sımvoly.
«Búgin barshamyz úshin aıtýly kún - elordamyz Astananyń týǵan kúni! Klýbymyzdyń barlyq jankúıerlerin búgingi merekemen quttyqtaımyn! Dál osyndaı aıtýly merekede biz jańa formada oınaıtyn bolamyz. «Astana» - ÝEFA Chempıondar lıgasynda Qazaqstan namysyn qorǵaıtyn elimizdegi jalǵyz klýb bolǵandyqtan komanda formasy erekshe bolǵanyn qaladyq. Shańyraq - Qazaqstannyń sımvolyna aınalǵan, erekshe grafıkalyq element. Fýtbol súıer qaýym bizdiń oıyn formamyzdy kórgende tek elimizde ǵana emes, Eýropada da Qazaqstandyq komanda ekenimizdi aıqyndap tursa deımiz. «Astana» komandasy Chempıondar Lıgasynda osy oıyn formasymen óner kórsetýi úshin, ÝEFA-nyń arnaıy sheshimin uzaq ýaqyt kúttik. Mine, sol kelissózder sátti aıaqtalyp, biz jańa oıyn jeıdesimen alańǵa shyǵýǵa daıynbyz. Aldaǵy birneshe aptadan keıin jańa oıyn jeıdesiniń arnaıy tanystyrylymyn uıymdastyratyn bolamyz. Tanystyrý rásimi aıaqtalǵannan keıin jańa oıyn formasyn bizdiń saýda oryndarymyzdan satyp alýǵa tolyqtaı múmkindikterińiz bolady. Jankúıerler úshin taǵy bir qýanyshty jańalyq - biz osy joly tek erlerge arnalǵan oıyn formasyn emes, kishkentaı balalar men qyzdarǵa da arnalǵan úlgisin de usynǵaly otyrmyz, - deıdi «Astana» fýtbol klýbynyń atqarýshy dırektory Qaısar Bekenov.
