«Astana» shabandozy «Trofeo Palma» jarysynda júldeli boldy

ASTANA. KAZINFORM — Ispanııada «Challenge Mallorca» serııasynyń qorytyndy «Trofeo Palma» bir kúndik jarysy ótti.

Jarys jappaı sprıntpen aıaqtaldy. XDS Astana Team shabandozy Maks Kanter márege 250 metr qalǵanda sprıntti ashyp, nátıjesinde ekinshi orynǵa ıe boldy.

Red Bull–BORA–hansgrohe komandasynyń múshesi, belgııalyq Arne Marıt jeńiske jetti, onyń komandalasy, ıtalıandyq Alessıo Magagnottı úshinshi oryndy ıelendi.

Jarys aıaqtalǵannan keıin Qazaqstan quramasynyń nemis sprınteri Maks Kanter komandanyń úılesimdi jumysyn joǵary baǵalady.

— Jarys boıy qoldaý kórsetkeni úshin komandaǵa alǵys aıtqym keledi. Komanda búgingi kúnge jaqsy jospar qurdy jáne bári biz oılaǵandaı boldy. Jaraqat saldarynan Gleb Syrıtsa jarys jolynan shyǵyp qaldy, fınalda onyń orny bilinip turdy. Maık Tenıssen bir shaqyrym belgiden márege deıin keremet aýysym jasady, ol sońǵy 400 metrge deıin sozyldy. Ol jerde tómen jyldamdyqpen sál erterek shyǵýǵa týra keldi. Biraq márege birinshi bolyp kele almadyq. Degenmen, bizde júldeli ekinshi oryn bar, sondyqtan biz bul jarysty jaqsy kóńil-kúımen aıaqtaımyz. Alda jattyǵý jıyny bar, — dedi Maks Kanter.

«Challenge Mallorca» serııasynyń bes jarysynyń qorytyndysy boıynsha XDS Astana Team komandasynyń esebinde eki júldeli oryn bar. Atap aıtqanda, Maks Kanterdiń ekinshi orny jáne «Trofeo Serra Tramuntana» jarysynda Krıstıan Skaronıdiń úshinshi orny.

Buǵan deıin «Astana» komandasynyń shabandozy Saýd Arabııasyndaǵy kópkúndikte ekinshi oryn aldy.