«Astana» shabandozy Oman týrynyń jalpy esebinde ekinshi orynǵa kóterildi

ASTANA. KAZINFORM – XDS Astana Team komandasynyń veloshabandozy Krıstıan Skaronı kópkúndik Oman týry jarysynyń úshinshi kezeńinde ekinshi oryn alyp, jalpy esepte de ekinshi satyǵa kóterildi.

Eastern Mountain kóterilýimen aıaqtalǵan kezeń shaǵyn kóshbasshylar toby arasyndaǵy qarqyndy sprıntpen támamdaldy. Qazaqstandyq komanda sapyndaǵy ıtalııalyq sportshy Shveıtsarııa chempıony Maýro Shmıdtiń (Team Jayco AlUla) sońǵy qarqynyna jaýap berdi, alaıda márede ony basyp oza almaı, ekinshi bolyp keldi. Úshinshi oryndy norvegııalyq Martın Tetta (Uno-X Mobility) ıelendi.

XDS Astana Team komandasynyń taǵy eki ókili Krıstıan Rodrıges pen Dıego Ýlıssı sáıkesinshe jetinshi jáne onynshy oryndarǵa turaqtady. Osy nátıjelerdiń arqasynda Skaronı jalpy esepte ekinshi orynǵa kóterildi.

– Kezeń jalpy alǵanda tynysh ótti, márege jaqyn aınalma jolda bolǵan qulaýdy eseptemegende. Baqytymyzǵa qaraı, men jáne Dıego Ýlıssı qulaýdan aman qaldyq, biraq aldyńǵy topty qýyp jetýge týra keldi. Márelik kóterilý maǵan yńǵaıly boldy, al Dıego meni fınalda óte jaqsy pozıtsııaǵa shyǵardy. Shmıd sprıntti erterek bastady, men onyń shabysyna ilestim, sońynda aldyna shyǵamyn dep oıladym, biraq ol qarqynyn sońyna deıin saqtap qaldy. Búgin Maýro myqty boldy. Soǵan qaramastan, kezeńniń jalpy nátıjesi jaqsy. Qazir men jalpy esepte ekinshi oryndamyn, sondyqtan sársenbi kúni ótetin sheshýshi kezeńge daıyndalamyz, – dedi Krıstıan Skaronı komandanyń baspasóz qyzmetine.

Buǵan deıin XDS Astana Team komandasynyń taǵy bir shabandozy Henok Mýlıýbyrhan «Oman týrynyń» ekinshi kezeńinde márege ekinshi bolyp jetken edi.

Aıta keteıik, Mansur Beısembaı velosporttan Azııa chempıonatynyń júldegeri atandy.